“Onun sözlərini eşidəndə az qala stuldan yıxılacaqdım” – Makrona ETİRAZLAR

Fransa prezindeti Emmanuel Makronun Rusiyanın nüvə təhdidi ilə bağlı gözlənilməz açıqlamaları dünyada soyuq duş effekti yaradıb.

Sfera.az bildirir ki, Makronun Rusiyanın Ukraynaya nüvə zərbəsi endirəcəyi təqdirdə Fransanın bu silahından istifadə etməyəcəyini deməsi Polşa, Rumıniya, Slovakiya kimi NATO-ya üzv olan Avropa ölkələrində səs-küy yaradıb. Çünki NATO müqaviləsinin 5-ci maddəsinə əsasən, hücum zamanı üzvlər digərlərinin müdafiəsini təmin etməlidir.

Makronun sözügedən çıxışı həm də ölkə daxilində sərt tənqid edilib, Fransa müxalifətinin reaksiyasına səbəb olub. Belə ki, Fransanın keçmiş prezidenti Fransua Olland yerli mediaya açıqlamasında “Makron mümkün qədər az danışmalı və mümkün qədər daha çox şey etməyə hazır olmalıdır”, deyib.

Strateji Tədqiqatlar Fondunun beyin mərkəzinin direktor müavini Bruno Tertrais Fransa liderinə müraciət edərək bunları söyləyib: “Düşünürəm ki, düzgün cavab bu olmalı idi: mən bu oyunu oynamayacam. Cənab Putin artıq uduzacağını bilməlidir”.

Mühafizəkar deputat Jan-Luis Tiyerio isə Makronun çıxışı ilə bağlı fikirlərini bu cür ifadə edib: “Onun dediyini eşidəndə az qala oturduğum stuldan yıxılacaqdım. Bu, siyasi səhv idi”.

Emmanuel isə Rusiyanın nüvə silahından istifadə edəcəyi təqdirdə Fransanın ənənəvi cavabının nə olacağı ilə bağlı heç bir açıqlama verməyib.

Günay Rəsulqızı