“ABŞ Kəşfiyyat İdarəsi Rusiya ordusu daxilindən məlumat alıb, Ukraynaya ötürür”

Ukrayna savaşından 6 ay keçməsinə baxmayaraq, tərəflər hər hansı razılığa gələ bilməyib, həmçinin gərginliklər və itkilər hər keçən gün daha da artır.

Maraqlıdır, belə davam edərsə, müharibənin gələcək taleyi necə olacaq?

Bununla bağlı Sfera.az-a danışan politoloq Samir Hümbətov deyib ki, ABŞ Mərkəzi Kəşfiyyat İdarəsi və İngiltərənin Mİ6 kəşfiyyat xidmətinin mütəmadi olaraq Rusiya ordusu daxilindən məlumatlar alıb Ukraynaya ötürməsi müharibənin gedişinə təsir edən amillərdəndir:

“Son bir neçə gündə Ukraynanın əks-hücum əməliyyatlarına başlaması, Xerson kimi strateji əhəmiyyəti böyük olan bölgənin azad edilməsi uğrunda mübarizənin getməsi ilə bağlı informasiyalar verilir. Həmçinin Ukrayna tərəfinin əraziləri tam şəkildə azad edənə qədər müharibəni davam etdirəcəklərini bildirməsi də savaşın  gedişinə təsir edən psixoloji amillərdən hesab edilə bilər. Yayılan digər məlumat  ondan ibarətdir ki, Rusiya müharibədən öncə digər ölkələrə bağışladığı silah-sursat və hərbi texnikanı geri almağa başlayıb. Bu isə Rusiyanın ciddi itkilər verməsindən xəbər verir. Bir müddət öncə Ermənistana verdiyi  SU 29 döyüş təyyarələrini, 2018-ci ildə Suriyaya verdiyi S-300 raket kompleksini geri alması, hətta İrandan dronlar alması bu proseslərə sübut olaraq qeyd edilə bilər”.

Ekspertin sözlərinə görə, Rusiyanın Şimali Koreya ilə son alış-verişi onun artilleriya sistemlərinin ciddi şəkildə sıradan çıxmasından xəbər verir:

“Burada diqqəti cəlb edən digər önəmli məsələlərdən biri də müharibə başlayandan bəri Rusiyaya tətbiq edilən sanksiyalardır  - bunun da nəticəsində həm iqtisadiyyat, həm də müdafiə sənayesi ciddi ziyan görür. Araşdırma və təhlillər onu göstərir ki, Qərb dövlətləri Ukraynaya həm hərbi, həm kəşfiyyat dəstəyini, eyni zamanda Rusiyaya qarşı sanksiyaları davam etdirərsə,  qarşımızdakı 1 il və ya bir az artıq vaxt ərzində Rusiyanın Ukraynada məğlubiyyəti baş verə bilər”.

Günay Rəsulqızı