NATO üzvü olan Polşa Rusiyaya qarşı diqqətçəkən addım atıb.

Sfera.az bildirir ki, sözügedən ölkə Sovet dövründən qalma döyüş təyyarələri üçün əvəzedici tapmaq məqsədilə Asiyanın ən böyük güc mərkəzlərindən birinə üz tutub. Belə ki, Polşa bu yaxınlarda Cənubi Koreya ilə artilleriya, tank və təyyarə almaq üçün 14,5 milyard dollarlıq müqavilə imzalayıb.

Qeyd olunub ki, bu, Polşanın ən böyük silah müqavilələrindən biridir. Məlumata görə, Varşavanın 14,5 milyard dollarlıq müqaviləsinə 1000 K2 Qara Panter tankı, təxminən 700 K9 özüyeriyən haubitsa və 48 FA-50 yüngül döyüş təyyarəsi daxildir.

Bu barədə danışan Polşanın müdafiə naziri Mariusz Błaszczak jurnalistlərə, “Rusiya Federasiyasının Ukraynanı hədəf alan hücumu və Putinin gözlənilməz xarakteri o deməkdir ki, biz texnikanın modernləşdirilməsini daha da sürətləndirməliyik. Polşa üçün təhlükəsizlik səviyyəsini mümkün qədər tez artırmaq vacibdir”, – deyə söyləyib

.

Błaszczak həmçinin Sovet dövründən qalma iki təyyarənin "artıq köhnəldiyini" vurğulayıb. Müdafiə naziri bildirib ki, FA-50-lər Polşa Hərbi Hava Qüvvələrini daha da modernləşdirəcək, lakin bu, “son addım” olmayacaq.

Hərbi ekspertlər isə qeyd ediblər ki, Cənubi Koreyadan olan 48 FA-50 Varşavaya bu modernləşdirmə səylərini inkişaf etdirməyə kömək edəcək. Müqaviləyə əsasən, 2026-cı ilə qədər Polşada da FA-50 texniki xidmət obyekti yaradılacaq. Mütəxəssislərin fikrincə, bu tənzimləmə ilə Varşava MiQ-29 və Su-22-lərlə təchizat zənciri və texniki xidmət problemlərindən qaçmağa ümid edir.

Günay Rəsulqızı