Zelenskinin müşaviri yeni hücumların anonsunu verdi
Rusiya-Ukrayna müharibəsi fonunda Zelenskinin müşaviri Mixail Podolyakın son açıqlaması diqqət çəkib.
Sfera.az bildirir ki, o, “Guardian”a verdiyi açıqlamada ötən həftə Krım aviabazasında baş verənlərə bənzər yeni hücumlar proqnozlaşdırıb.
“Krımda dəmiryol qovşağına və aviabazaya, o cümlədən, keçən həftə yarımadanın Saki hava limanında Rusiya döyüş təyyarələrinə edilən hücuma oxşar yeni həmlələr mümkündür. Bizim strategiyamız logistika, təchizat xətləri, sursat anbarları və digər hərbi infrastruktur obyektlərini məhv etməkdir”.
Podolyak həmçinin qeyd edib ki, Kiyevin yanaşması Moskvanın Donbassın şərqində ərazi ələ keçirmək üçün iti artilleriyadan istifadə etməsinə mane olub və bu, rus qoşunlarının növbə ilə Mariupol və Syeverodonetsk kimi şəhərləri məhv etməyə sövq edib:
“Rusiya hamıya öyrətdi ki, əks-hücum nəhəng yumruq kimi çoxlu insan qüvvəsi tələb edir. Ukraynanın əks-hücumları isə çox fərqli görünür. Biz 60-70-ci illərin, keçən əsrin taktikasını işlətmirik. Krım körpüsünə gəldikdə isə onu qanuni hərbi hədəf kimi görürəm. Bu, qeyri-qanuni tikintidir və Krımda rus ordusunu təchiz etmək üçün əsas qapıdır. Belə obyektlər məhv edilməlidir”.
Qeyd edək ki, Rusiya Krımın Cankoy rayonundakı sursat anbarında dünən baş verən yanğının partlayışlara səbəb olduğunu bildirib. Ukrayna son hücumlara görə məsuliyyəti üzərinə götürməyib. Rusiya müdafiə nazirliyi isə təxribat halları ilə məşğul olduğunu və növbəti insidentlərin qarşısını almaq üçün “lazımi tədbirlər”in görüldüyünü bildirib.
Günay Rəsulqızı