Yaponiyanın baş nazirinə qarşı sui-qəsd təhlükəsi
Yaponiyada yeni bir sui-qəsd iddiası xəbəri gündəmə gəlib.
Sfera.az xəbər verir ki, Yaponiyada polis təcili yardım xəttinə zəng edərək Yaponiyanın Baş naziri Fumio Kişidanı sui-qəsdlə hədələyən 51 yaşlı kişini həbs edib.
Təhlükəsizlik mənbələrinin məlumatına görə, hadisə avqustun 10-da saat 19.30 radələrində baş verib. Paytaxt Tokio yaxınlığındakı Saitama şəhərində yaşayan 51 yaşlı Satoşi Yamaqişi polisin 110 təcili yardım xəttinə zəng edərək Kişidanı öldürməklə hədələyib. Texniki ekspertizadan sonra təhlükəsizlik qüvvələri həmin şəxsin ünvanını müəyyən edib və şübhəli şəxsi evində yaxalayıb.
Polisə verdiyi ifadədə ittihamları rədd edən Yamaqişi hadisədən xəbəri olmadığını bildirib.
Digər tərəfdən, şübhəlinin evində aparılan axtarış zamanı heç bir silah-sursat tapılmayıb, həmin şəxsin siyasi və ya dini təşkilatla əlaqəsi müəyyən edilməyib. Hadisə ilə bağlı ətraflı araşdırmalara başlanılıb.
Turan Rzayev,
Sfera.az