İran-Əfqanıstan sərhədində silahlı qarşıdurma baş verib və hər iki tərəfin sərhəd qüvvələri bir-birlərinə ağır və yüngül silahlardan atəş açıblar.

Sfera.az xəbər verir ki, bu barədə İran İslam İnqilabı Keşikçiləri Korpusunun (SEPAH) sosial media hesablarında məlumat yayılıb. 

Məlumatda atışmanın Sistan-Bəlucistan əyalətinin Hirmənd bölgəsinin Şoğalək kəndi yaxınlığında baş verdiyi bildirilir.

İran mediasının iddiasına görə, silahlı qarşıdurmaya səbəb Taliban sərhədçilərinin sərhədə yaxın bölgələrdə işləyən İran əkinçilərinə maneçilik törətmələri olub.

Taliban hökumətinin yerli nümayəndələri İran tərəfinin iddialarını rədd edib və İran sərhədçilərinin Əfqanıstan ərazisinə girdiyi üçün onlara cavab verildiyini bildiriblər.

Qeyd edək ki, son aylar İranla Əfqanıstan arasında gərginlik artıb və hər iki ölkə sərhədə ağır texnika və canlı qüvvə cəmləşdirməyə davam edir.

Turan Rzayev,

Sfera.az