Paytaxtda fövqəladə vəziyyət elan olundu: İsti havalara görə
Londonda fövqəladə vəziyyət elan edilib.
Sfera.az bildirir ki, buna səbəb kimi hava temperaturunun həddən artıq yüksək olması göstərilib. Belə ki, Londonun qərbində yerləşən Hitrouda temperatur 40,2 dərəcə ilə rekord qırıb. Paytaxt yaxınlığındakı çəmənliklərdə və meşələrdə yanğınla 250 yanğınsöndürən mübarizə aparıb. London meri Sadiq Xan vəziyyətin “kritik” olduğunu deyib.
Qeyd olunub ki, Böyük Britaniyada isti dalğasının davam edəcəyi, hətta gecə temperaturunun 25 dərəcə civarında qalacağı və bu gündən etibarən temperaturun düşməyə başlayacağı gözlənilir. Meteorologiya Departamenti tarixində ilk dəfə olaraq ekstremal temperatur üçün qırmızı həyəcan səviyyəsinin keçdiyini açıqlayıb. Qırmızı xəbərdarlıq səviyyəsi o deməkdir ki, vətəndaşlara və infrastruktura geniş təsirlər gözlənilir və gündəlik rejimlərdə və iş şəraitində əhəmiyyətli dəyişikliklər tələb olunacaq.
Digər tərəfdən İngiltərədə məktəblər erkən bağlanıb, Milli Dəmir Yolları Şəbəkəsi vətəndaşları yalnız zəruri hallarda səyahət etməyə çağırıb. Meteorologiya Departamentinin xəbərdarlıq səviyyəsinə dair elanı ilə yanaşı, İngiltərə Sağlamlıq Təhlükəsizliyi Təşkilatı da dördüncü səviyyədə xəbərdarlıq edildiyini bildirib. Bu, "milli fövqəladə vəziyyət" kimi təsvir olunub. Səhiyyə naziri Steve Barclay, isti dalğası səbəbindən təcili yardım imkanlarının artırıldığını vurğulayıb.
Qeyd edək ki, Böyük Britaniyada tarixin ən yüksək temperaturu 2019-cu ildə Kembricdə qeydə alınıb. Həmin vaxt havanın temperaturu 38,7 dərəcə olub.
Günay Rəsulqızı