ABŞ Navalnıya görə Rusiyaya qarşı sanksiyalar hazırlayır
Dünya
13:45 / 04.02.2021
782
ABŞ-ın həm Demokratlar Partiyası, həm də Respublikaçılar Partiyasından olan bir qrup senator Konqresə Aleksey Navalnının həbsi ilə bağlı Rusiyaya qarşı sanksiyaların tətbiqinə dair qanun layihəsi təqdim edib.
Sfera.az xəbər verir ki, müvafiq məlumat Florida ştatının Respublikaçılar Partiyasından senatoru Marko Rubionun saytında dərc edilib.
"Senatorlar beynəlxalq hüquq pozuntusu, həmçinin Aleksey Navalnının zəhərlənməsi və həbs edilməsində əli olan rusiyalı məmurlara qarşı məqsədyönlü sanksiyaların tətbiqini nəzərdə tutan qanun layihəsini təkrarən təqdim ediblər”, - məlumatda bildirilib.
Söhbət senatorların ötən ilin sentyabrında Rusiya hakimiyyətinə qarşı tətbiqini təklif etdiyi sanksiya layihəsindən gedir.
Qanun layihəsindəki mümkün sanksiyalara aktivlərin dondurulması və viza verilməsindən imtina daxildir.
Sənəddə ABŞ administrasiyasının Rusiya rəhbərliyinin kimyəvi və bioloji silahların istifadəsini qadağan edən beynəlxalq müqavilələri pozub-pozmadığını müəyyənləşdirməli olduğu vurğulanıb.
Xatırladaq ki, ABŞ-da respublikaçı senator Mitt Romni Rusiyada Aleksey Navalnının həbsinə məsul olan şəxslərə qarşı sanksiya tətbiqinə dair qanun layihəsini təqdim edəcəyini bildirmişdi.
