Daha bir kredit dəhşəti - ÖZÜNÜ YANDIRMAQ İSTƏDİ
Cəmiyyət
03:40 / 17.07.2015
2114
İyulun 13-də «Accessbank» ASC-nin İmişli şəhərində yerləşən filialının qarşısında qalmaqal olub. Beyləqan rayonu Qarallar kəndinin sakini Cahangir Ağayev intihara cəhd edib.
FaktXəbər-in məlumatına görə, bu barədə AzadlıqRadiosuna hadisənin şahidləri bildirib.
Şahidlərin dediyinə görə, Cahangir Ağayev əvvəlcə filialın yerləşdiyi ofis önündə bank işçilərindən birinə zəng vuraraq bayıra çıxmağını tələb edib. Həmin şəxs həm özünün, həm də filial işçisinin üzərinə benzin töküb. Sonuncu qaçmaqla canını yanğından qurtara bilib. Hadisə yerinə çoxsaylı polis əməkdaşları gəlsə də, onlar da bir müddət Cahangir Ağayevə yaxınlaşa bilməyiblər.
Lakin İmişli polisinin əməkdaşları C.Ağayevi zərərsizləşdirə və onu polis idarəsinə aparmağa müvəffəq olublar.
«Accessbank» ASC İmişli filialının müdiri Eldar Fərhadov hadisənin baş verdiyini təsdiqləyib: «Bu şəxs bizim müştərimiz olub. Onu narazı salan kredit ödənişində gecikməyə görə, əməkdaşımızın evinə getməsi olub. Biz problemli kreditlərlə bağlı məhkəməyə başqa banklarla müqayisədə çox az müraciət edirik. Çalışırıq danışıqla problemi yoluna qoyaq. Bank əməkdaşının onun qapısına getməyi də xoşməramlı olub».
İmişli RPŞ-dən bildirildi ki, saxlanılıb polis idarəsinə aparılan C.Ağayev izahatı alındıqdan sonra sərbəst buraxılıb.
