Fərid Əliyevin hazırda dindirildiyi bildirilir

Bu gün saat 17:39 radələrində Səməd Vurğu 60 ünvanında yerləşən  «AF Sentr» Ticarət Mərkəzində fəaliyyət göstərən «İrobot» şirkətinin mağazasında oğurluq hadisəsi baş verib. 

Şirkətin Azərbaycandakı təmsilçisi Elşən Quliyev hadisə barədə bizimyol.info saytına məlumat verib. Onun sözlərinə görə, müştərilərdən biri satıcı Fərhad Quliyevə yaxınlaşaraq ondan təmizlik robortu üçün əlavə aksessuar alıb və pulunu ödəyib. Daha sonra o, satıcıdan əlavə paket istəyib. Fərhad Quliyev ona paket gətirmək üçün müştəridən aralanıb, bu zaman həmin şəxs digər aksessuar komplektini götürərək aradan çıxıb. 

Satıcı müştərinin hərəkətindən şübhələndiyi üçün nəzarət kamerasına baxıb və onun komplekti oğurladığını görüb. Dərhal hadisə barədə DİN-in 102 xidmətinə məlumat verib. Qısa müddətdə mağazaya ətrafdakı polis əməkdaşları daxil olub. Onlar satıcı Fərhad Quliyevi özləri ilə yaxınlıqdakı polis bölməsinə aparıblar. Elşən Quliyevin sözlərinə görə təxminən 40 dəqiqə sonra oğurluq edən şəxsin yaxalandığı barədə ona məlumat verilib. Məlum olub ki, həmin şəxs Quba Rayon Polis şöbəsinin əməkdaşı Fərid Əliyevdir. Mənbə onun hazırda polis bölməsində saxlanıldığını bildirib. Bölmədə satıcının ərizəsi alınıb. Fərid Əliyev isə hadisəni törətmədiyini bildirib. Şirkətin təmsilçisi isə hadisənin görütülərini bizimyol.info-ya təqdim edə biləcəyini deyib. Hadisə barədə əlavə məlumat veriləcək.

Sfera.az