Türkiyə ərazisindən Suriyaya keçmək istəyən 5 azərbaycanlı saxlanılıb.

Sfera.az “Anadolu” agentliyinə istinadən xəbər verir ki, bu barədə məlumat Türk Silahlı Qüvvələrinin hesabatında yer alıb.

Hesabatda Türkiyə hüquq-mühafizə orqanlarının son altı ayda qeyri-qanuni yollarla Suriyaya keçmək istəyən 32 ölkədən olan 457 xarici ölkə vətəndaşını saxlandığı qeyd olunub. Onların yarısı – 241 nəfəri Çin vətəndaşı olan uyğurlardır.

Hesabata görə, həbs olunanlar arasında 56 Rusiya, 30 Fələstin, 29 Türkmənistan, 13 Böyük Britaniya, 12 Fransa, 9 Səudiyyə Ərəbistanı, 7 Əfqanıstan, 6 Cənubi Koreya, 6 Tacikistan vətəndaşı ilə yanaşı, 5 Azərbaycan vətəndaşı da var. Saxlanılanların kimliyi haqda məlumat verilmir. Bununla yanaşı, Suriyaya keçmək istəyənlər arasında Almaniya, Hollandiya, Belçika, Avstraliya, Braziliya vətəndaşları da var. Həbs olunanların İŞİD sıralarına qatılmaq istədiyi bildirilir.