Döyülən jurnalist Rasim Əliyev vəfat etdi – Son müsahibəsi
Cəmiyyət
22:39 / 09.08.2015
2151
Jurnalist Rasim Əliyev avqustun 9-da səhərə yaxın Bakı Klinik mərkəzində rəhmətə gedib.
Bu barədə Amerikanın Səsinə jurnalistin bacısı Gülnarə Əliyeva bildirib. Gülnarə Əliyeva bildirib ki, gecə saatlarında Rasim Əliyevin səhhəti kəskin pisləşib və 1 saylı Şəhər Kliniki Xəstəxanasında cərrahi əməliyyat olunub. Bundan sonra reanimasiya şöbəsinə köçürülüb və orada vəfat edib.
Hazırda jurnalistin cəsədi Respublika Xəstəxanasının morquna yerləşdirilib.
Xatırladaq ki, jurnalist dünən “Qəbələ” futbol komandasının oyunçusu Cavid Hüseynovun qohumları tərəfindən hədələndiyini və döyüldüyünü iddia etmişdi.
Sosial mediada verilən məlumatlara görə, jurnalistin döyülməsinə səbəb onun Cavid Hüseynovun kiprli jurnalistə qarşı hərəkətini “Facebook” səhifəsində tənqid etməsi göstərilib.
Cavid Hüseynov isə “Qafqazinfo”ya açıqlamasında bu iddianı qəbul etmədiyini açıqlamışdı:
“O jurnalistә hәr şeyi olduğu kimi danışdım. Videoya kim baxsa, görәr ki, mən yumruğumu yumruğuma vurub bizim yumruq kimi ölkә olduğumuzu demişәm. Biz qardaşıq, biz dostuq. Ona dedim ki, yazını düzәlt. Dedi ki, oldu. Üzr istәyirәm sәhvimә görә. Biz bunları danışmışıq. Amma döymәk söhbәti düzgün deyil”.
