"Bakı Kart" pulumuzu "udanda" nə etməliyik? — RƏSMİ CAVAB
Cəmiyyət
15:33 / 07.09.2015
1776
"Bakı Kart" bundan əvvəlki kartlardan fərqli olaraq yeraltı və yerüstü nəqliyyatda da istifadə oluna bilməsi ilə seçilir.
"Bakı Kart"ın üstünlükləri qədər mənfi cəhətləri də ortaya çıxıb.
"Bakı Kart"a nəzərdə tutulmuş xüsusi aparatdan pul yükləyən zaman ödənişin nəticəsi olaraq aparat qəbz dərc edir. Bundan əvvəlki metro kartlarında ödənişiniz kartın balansına oturmayanda aparatın sizə verdiyi qəbzi metropoliten əməkdaşına təqdim edir, qəbzdəki məbləği kartın balansına "oturtmaq" olurdu. Ancaq "Bakı Kart"larda bunun mümkün olmadığı ortaya çıxıb.
Ötən gün əməkdaşımız da bu problem ilə qarşılaşıb. Metronun "Nəsimi" stansiyasında "Bakı Kart"a 1 manat yükləyən zaman aparat pulu qəbul edib, lakin pul kartın balansına yüklənməyib. Aparatın verdiyi qəbzi metropoliten işçisinə təqdim edən əməkdaşımıza metro stansiyasında yerləşən kassadan bildiriblər ki, əvvəlki metro kartlarında bu mümkün idi, ancaq "Bakı Kart"larda mümkün deyil. Mümkündürsə də, onlara bunun qaydasını öyrətməyiblər: "Bizə elə bir tapşırıq da verməyiblər ki, qəbzi götürüb məbləği müştəriyə qaytaraq, yaxud kartına yükləyək".
Məsələ ilə bağlı "Bakı Metropoliteni" QSC-nin Mətbuat Xidməti və İctimaiyyətlə Əlaqələr şöbəsinin rəisi Nəsimi Paşayevlə əlaqə saxladıq. Şöbə rəisi ölkə.az-a bildirdi ki, xidməti göstərən "Bakı Kart"dır. "Bakı Kart"ın "20 yanvar", "İnşaatçılar", "Cəfər Cabbarlı" və "Nəriman Nərimanov" stansiyalarında olmaqla Bakı metropolitenində 4 analiz mərkəzi var. "Bakı Kart"larda problemi olan vətəndaşlar kart və qəbzlə sadəcə həmin mərkəzlərə yaxınlaşıb problemlərini həll edə bilər. "Bakı Kart"ın tabeçilik baxımından Metropoliten idarəsinə heç bir aidiyyatı yoxdur, onlar xidmət göstərirlər.
