Toğrul Əsgərov erməniyə qalib gəldi - VİDEO

Amerika Birləşmiş Ştatlarının Las Veqas şəhərində 2016-cı ildə Braziliyanın Rio-de Janeyro şəhərində keçiriləcək XXXI Yay Olimpiya Oyunlarına ilk lisenziyaların qazanıldığı güləş üzrə dünya çempionatı davam edir.

Sfera.az-ın Azərbaycan Güləş Federasiyasının rəsmi saytına istinadən verdiyi məlumata görə, dördüncü yarış günündə 55, 58, 63 və 75 kq çəki dərəcəsində qadın, 65 kq çəkidə sərbəst güləşçilər yarışır. 

Azərbaycan güləşçiləri 4 çəki dərəcəsində mübarizə aparır. Natalya Sinişin, Yuliya Ratkeviç və Nadya Muşka Sementsova, kişilərdən isə Toğrul Əsgərov yarışıb.   

Qeyd edək ki, bu günə qədər yunan-Roma güləşçilərimizdən Rövşən Bayramov (59 kq), Elvin Mürsəliyev (75 kq), Saman Təhmasibi (85 kq) və Sabah Şəriəti (130 kq), qadın güləşçilərdən Mariya Stadnik (48 kq) və Anjela Doroqan (53 kq) Olimpiya Oyunlarına vəsiqə əldə edib. Rəsul Çunayev (71 kq) qızıl, Rövşən Bayramov (59 kq) gümüş, Saman Təhmasibi (85 kq) bürünc medala yiyələnib. 

Qadın güləşçilər

55 kq

Bu çəki dərəcəsində ölkəmizi təmsil edən Natalya Sinişin mübarizəyə 1/8 finaldan qoşulub. O, ilk görüşündə çinli Qianyu Panqla üz-üzə gəlib və rəqibinə 0:10 hesabı ilə uduzub.

58 kq

Dünya və Avropa çempionumuz Yuliya Ratkeviç 1/16 finalda Rusiya idmançısı Natalya Qoltsa 4:0 hesabı ilə qalib gələrək 1/8 finala adlayıb. Burada ukraynalı Tetyana Lavrençuka 6:0 qalib gələn Ratkeviç 1/4 finala adını yazdırıb. Bu mərhələdə Qazaxıstan güləşçisi Ayim Abdildinanı 7:5 hesabı ilə məğlub edən təmsilçimiz yarımfinala adlamaqla yanaşı, Rio-de Janeyro Olimpiyadasına vəsiqəni təmin edib. O, finala gedən yolda finlandiyalı Petra Maaritlə güləşib. Rəqibinə 6:8 hesabı ilə uduzan Ratkeviç bürünc medal uğrunda isveçli Malin Yohanna Mattssonla yarışacaq. 

63 kq

Yığmamızın digər üzvü Nadya Muşka Sementsova 1/16 finalda hindistanlı Anita Anita ilə münasibətlərinə aydınlıq gətirib. Lakin güləşçimiz ilk görüşündə rəqibinə 1:9 hesabı ilə uduzub.

Sərbəst güləş, 65 kq

Avropa oyunlarının qalibi Toğrul Əsgərov mübarizəyə 1/32 finaldan qoşulub. İlk görüşündə qazaxıstanlı Sayatbek Okassova 7:2 hesabı ilə qalib gələn Toğrul 1/16 finalda erməni Devid Safaryanla üz-üzə gəlib. Rəqibi üzərində 8:2 hesablı qələbə qazanan Əsgərov 1/8 finala yüksəlib. O, bu mərhələdə gürcüstanlı Avtandil Kençadzedən üstün olub - 9:2. Lakin 1/4 finalda italiyalı Frank Çamizo Markezlə qarşılaşan Olimpiya çempionumuz rəqibinə 5:10 hesabı ilə uduzub. İtaliya idmançısı finala qədər irəlilədiyi üçün Toğrul Əsgərov təsəlliverici yarışa qatılıb. Onun rəqibi Polşa idmançısı Maqomedmurad Qadjiyev olacaq.

Sfera.az