Bu gün Bakı Ağır Cinayətlər Məhkəməsində kişiləri internet üzərindən qızlar vasitəsilə görüşə çağıran, orada isə hədələyərək pulunu almaqda təqsirləndirilən dəstə üzvləri - İsmayıl Meybullayev, Rəhim Rəhimov, Elnur Balakişiyev, Asiman Məmmədov və Arifə Musayevaya hökm oxunub.

Sfera.az qafqazinfo-ya istinadən xəbər verir ki, hakim İradə Həsənzadənin icraatında olan prosesdə R.Xəlilov 14 il, İ.Meybullayev və R.Rəhimov hər biri 10 il 6 ay, E.Balakişiyev 10 il 3 ay, A.Məmmədov isə 10 il müddətinə azadlıqdan məhrum edilib.

A.Musayevaya şərti cəza verilib, o, məhkəmə zalından azadlığa buraxılıb. E.Baxşıyev istintaq dövründə azadlıqda olduğu üçün bu gün məhkəmə zalında həbs edilib.

İttihama görə onlar əvvəlcədən dəstəyə üzv etdikləri qızlar vasitəsilə "Facebook" və "Odnoklassniki"də intim xidmət göstərmələri barədə elan veriblər. Həmin qızlar zəng edərək tora düşən gəncləri müəyyən olunan kafeyə dəvət ediblər.

Müştərilər masada əyləşən kimi iki qız onun stoluna yaxınlaşıb, barmen isə sifariş gözləmədən stola içkilər düzüb. Hətta bahalı içki adı ilə təqdim edilənlər də adi meyvə suyu olub. Sonradan isə qızlar intim xidmət üçün təklif etdikləri pulu müştəridən alaraq otağın təmiz olub-olmadığını yoxlamaq istədiklərini deyərək masadan uzaqlaşıblar. Bu zaman barmen sürpriz hesabı müştəriyə təqdim edib. Yüksək məbləği görən gənclər içmədikləri içkiyə görə pul ödəməkdən imtina etdikdə qoluzorlu adamlar onları başqa bir qaranlıq otağa salıb döyərək ciblərindəki pulu götürüblər. Bakı şəhər sakini, 1968-ci il təvəllüdlü İlkin Qəhrəmanovdan 50 manat, Bakı şəhər sakini, 1968-ci il təvəllüdlü Elxan Abbasovun 40 manat, Bakı şəhər sakini, 1975-ci il təvəllüdlü Sakit Qurbanovdan 65 manat, Yardımlı rayon sakini, 1986-cı il təvəllüdlü Muxtar Sətiyevdən 740 manat pulu bu kafedə alıblar. Həmin zaman zərərçəkmişlərin hər biri döyülərək xəsarət alıb.

Gənclərə “seks tələsi” quranlara ağır cəza verildi - Qızlar buraxıldı