Məhbusların qaçması məsələsi nazirlikdə müzakirə olundu - Proseslə bağlı YENİ MƏLUMAT - VİDEO
Sfera.az bildirir ki, bu barədə Ədliyyə Nazirliyində keçirilən kollegiyada məlumat verilib. Məlumatda bildirilib ki, 15 nəfər ədliyyə orqanlarından xaric olunub və ya tutduğu vəzifədən azad edilib, 4 nəfər, o cümlədən Konvoy taborunun komandiri olmuş Bəhruz Abdullayev vəzifə səlahiyyətlərindən sui-istifadəyə görə cinayət məsuliyyətinə cəlb edilərək həbs olunub. Həmçinin, hadisənin fəsadlarının aradan qaldırılması üzrə görülmüş təxirəsalınmaz əməliyyat tədbirləri nəticəsində həbsdən qaçan şəxslərdən biri tutularaq istintaq təcridxanasına qaytarılıb, digərinin axtarışı üzrə zəruri tədbirlər davam etdirilir.
Bu arada, məhbusların qaçmasına yardım göstərdiyinə görə həbs edilən taksi sürücüsü Məhəmməd Hacıyev məhkəmədə elan olunmuş ittiham üzrə özünü təqsirli bilib. O, məhkum Etibar Məmmədovu bir neçə istiqamətdə Azərbaycan sərhədindən keçirməyə cəhd etdiyini deyib.
Məhəmməd Hacıyevin sözlərinə görə, məhbus polis postuna çatanda avtomobilin baqajında gizlənib. "Sonuncu dəfə Gürcüstana keçmək istəyəndə bizi saxladılar. Bu vaxt o, baqajdan düşərək qaçdı". Hazırda Etibar Məmmədovun axtarışı istiqamətində tədbirlər davam etdirilir.
Qeyd edək ki, Nəsimi Rayon Məhkəməsində hakim Pərviz Hüseynovun sədrliyi ilə keçirilən prosesdə Məhəmməd Hacıyev barəsində 3 ay müddətinə həbs qətimkan tədbiri seçilib.
Həbs edilən müğənni Fədayə Laçının bacısı İlahə Fəda açıqlamasında bildirdi ki, hazırkı vəziyyətdə danışmaq istəmir. "İstintaq aparıldığı üçün heç bir məlumat verə bilmərəm. İstintaq bitsin, bacımın günahsız olduğu bilinsin, ondan sonra hamıya sözümü deyəcəm, açıqlamalar verəcəm. İndi hər hansı bir fikrim istintaqın gedişinə təsir edə bilər. Qanunlara zidd heç bir hərəkət etmək istəmirəm", - deyə İlahə Fəda bildirib. /xezerxeber.az
