Azərbaycanlılara 20 milyard manatdan çox məhsul satıldı
2015-ci ilin yanvar-oktyabr aylarında istehlakçılara 20,4 milyard manatlıq və ya 2014-cü ilin müvafiq dövrü ilə müqayisədə 11,2% çox məhsul satılıb.
Bu barədə Dövlət Statistika Komitəsindən (DSK) Oxu.Az-a bildirilib.
DSK-nın məlumatına görə, ərzaq məhsulları, içkilər və tütün məmulatları üzrə satışın həcmi 10% artaraq 10 168,3 milyon manata, qeyri-ərzaq məhsulları üzrə isə 13,4% artaraq 10 224,8 milyon manata bərabər olub.
Bundan başqa, komitədən qeyd edilib ki, cari ilin 10 ayında elektron ticarətin həcmi əvvəlki illə müqayisədə artıb:
“Cari ilin on ayında elektron pərakəndə ticarət dövriyyəsinin həcmi əvvəlki ilin eyni dövrünə nisbətən 1,9 dəfə artaraq 10,5 milyon manat təşkil edib. Elektron ticarət vasitəsi ilə əhalinin sifariş verdiyi istehlak məhsullarının 91,9%-i i hüquqi şəxslərdən, 8,1%-i isə fərdi sahibkarlardan alınıb. Elektron ticarət dövriyyəsinin 96,3%-i qeyri-ərzaq məhsullarının payına düşüb.
2015-ci ilin yanvar-oktyabr aylarında iaşə xidmətlərinin həcmi əvvəlki ilin eyni dövrü ilə müqayisədə 14,1% artaraq 841,6 milyon manat olub. Hüquqi şəxslər üzrə iaşə xidmətlərinin həcmi 366,7 milyon manat, bu sahədə fəaliyyət göstərən fərdi sahibkarlar üzrə isə 474,9 milyon manat təşkil edib”.