Şaiq Hüseyn zərərçəkənin 70.000 manat pulunu mənimsəyib.

Bakı Apellyasiya Məhkəməsində Bakı ş. sakini Şaiq Hüseynin CM-nin 178.3.2 (dələduzluq, külli miqdarda ziyan vurmaqla törədildikdə) və 306.1-ci (qanuni qüvvəyə minmiş məhkəmə qətnaməsini, qərardadını və ya qərarını qərəzli olaraq icra etməmə və ya həmin məhkəmə aktlarının icrasına maneçilik törətmə) maddələri ilə təqsirləndirilməsinə dair cinayət işi üzrə məhkəmə prosesi başa çatıb.

Oxu.Az xəbər verir ki, Sabunçu rayon sakini, Şölə Səfərovanın (1977-ci il təv.) polisə müraciəti əsasında ötən il aprelin 12-də Ədliyyə Nazirliyi Məhkəmə Qərarlarının İcrası Baş İdarəsinin Xətai rayon şöbəsinin keçmiş icra məmuru Hüseyn Şaiq Şadman RPİ-nin əməkdaşları tərəfindən saxlanılıb.

Zərərçəkən müraciətində 70.000 manat pulunun dələduzluq yolu ilə Şaiq Hüseyn tərəfindən mənimsənildiyini bildirib.

Qadın göstərib ki, qardaşı bir müddət əvvəl həbs olunub, onun azad edilməsi və ya cəzasının yüngülləşdirilməsi məqsədilə ədliyyə kapitanı Şaiq Hüseynlə tanış olub.

Sonuncu qadını ona kömək edəcəyinə inandırıb və ümumilikdə sözügedən məbləği alıb, amma üstündən 1 ilə yaxın vaxt keçməsinə baxmayaraq Ş.Səfərovanın qardaşının işi ilə bağlı hər hansı irəliləyiş olmayıb.

Aldadıldığını başa düşən Səfərova verdiyi pulunu geri qaytarmağa çalışsa da, buna nail ola bilməyib.

Bakı Ağır Cinayətlər Məhkəməsinin hökmü ilə Şaiq Hüseynov 10 il müddətinə azadlıqdan məhrumetmə cəzasına məhkum olunub. Hökmdən təqsirləndirilən şəxsin müdafiəçisi apellyasiya şikayəti verib.

Bakı Apellyasiya Məhkəməsi işi araşdıraraq birinci instansiya məhkəməsinin hökmünü qüvvəsində saxlayıb.

Yayılan məlumata görə, Şaiq Hüseyn keçmiş deputat, mərhum Şadman Hüseynin oğludur.