Ən bahalı “iPhone”da çatışmazlıqlar üzə çıxdı
Jurnalistlər “Apple” şirkətinin qatlanan smartfonu “iPhone Duo”nun bəzi çatışmazlıqlarını aşkarlayıblar.
Sfera.az xəbər verir ki, "MacRumors" nəşrinin məlumatına görə, əsas narazılıqlar Face ID üz tanıma sisteminin olmaması və Touch ID barmaq izi skanerinin işi ilə bağlıdır.
Nəşrin müəllifi Culi Kloverin araşdırdığı rəylərdə istifadəçilər telefonun kilidini açarkən gecikmələrdən, yaş barmaqların tanınmasındakı çətinliklərdən və səhv barədə təsadüfi vibrasiya siqnallarından şikayət ediblər. Bəzi icmal müəllifləri hətta bir həftə ərzində bu sistemə öyrəşməkdə çətinlik çəkiblər.
Bloqer Markes Braunli kilidin açılması zamanı süni gecikməyə diqqət çəkib. Onun sözlərinə görə, barmaq skanerə toxunduqdan sonra telefon qısa müddətə kilid ekranında qalır.
“Mrwhosetheboss” kanalının müəllifi isə əsas problemlərin əlləri yuduqdan sonra və barmaqlar bir qədər yağlı olduqda yarandığını bildirib.
Qeyd edək ki, “iPhone Duo”nun qiyməti 1999 dollardır. Bu, onu “Apple”ın ən bahalı smartfonu edir.
Bununla belə, bəzi narahatlıqları “Apple Watch” vasitəsilə telefonun kilidini açmaqla aradan qaldırmaq mümkündür. Touch ID ilə bağlı rəylər isə fərqlidir. “The Verge” skanerə zamanla öyrəşməyin mümkün olduğunu qeyd etdiyi halda, “9to5Mac” onun sürətli və etibarlı işlədiyini bildirib.
Bundan əvvəl ekspert İlya Korniychuk yüksək qiymətə görə “iPhone Duo”nun Rusiyada alıcılar arasında geniş tələbat görmədiyini açıqlamışdı. Onun fikrincə, bazardakı qeyri-sabitlik aradan qalxdıqdan sonra cihazı daha münasib qiymətə almaq mümkün ola bilər.
Fatimə
Sfera.az
