50 yaşadək insanlarda xərçəng halları kəskin artır - Səbəblər açıqlandı
Ümumdünya Xərçəng Araşdırmaları Fondunun (WCRF) analitikləri 2001-ci ildən etibarən İngiltərə, ABŞ və Niderlandda 50 yaşdan aşağı insanların xərçəngə tutulma hallarının kəskin artdığını müəyyənləşdiriblər. Mütəxəssislər bu narahatedici tendensiyanı qlobal piylənmə epidemiyası, düzgün olmayan qidalanma və gənclər arasında fiziki aktivliyin azlığı ilə əlaqələndirirlər.
Sfera.az xəbər verir ki, İngiltərədə 20 il ərzində 50 yaşadək kişilər arasında prostat xərçənginə tutulma halları dörd dəfə artıb: hər 100 min nəfərə 1 haldan 3,6 hala yüksəlib. Erkən yaşda bağırsaq xərçəngi halları isə iki dəfədən çox artaraq 3,9-dan 8,4-ə çatıb.
Böyrək və uşaqlıq yolu xərçəngi halları da iki dəfə artıb.
ABŞ-da 2000-ci ildən etibarən gənclər arasında böyrək xərçənginə tutulma halları da iki dəfədən çox artıb, bağırsaq və mədəaltı vəzi şişlərinin sayı isə 50 faizdən çox yüksəlib.
Alimlər qeyd edirlər ki, onkoloji xəstəliklərin təxminən 40 faizi dəyişdirilə bilən risk faktorları ilə əlaqəlidir. Bunlara artıq çəki, alkoqol istifadəsi, oturaq həyat tərzi və ətraf mühitin çirklənməsi daxildir.
Bununla yanaşı, hər üç ölkədə gənclər arasında ağciyər xərçənginə tutulma halları azalıb. Mütəxəssislər bunu siqaretlə mübarizənin uğurlu nəticəsi kimi qiymətləndirirlər.
“Bu, təcili şəkildə zərərsizləşdirilməli olan saatlı bombadır. Əks halda göstəricilər artmaqda davam edəcək. Həyat tərzi ilə bağlı amillər artıq minlərlə insanın ölümünə səbəb olur”, deyə Belfast Kral Universitetinin rəqəmsal səhiyyə professoru Mark Louler bildirib.
50 yaşadək insanlarda xərçəng xəstəliyi hələ də nisbətən nadir hal olaraq qalır. Diaqnoz qoyulmasının median yaşı 60-dan yuxarıdır.
Bu hadisənin əsl səbəblərini müəyyənləşdirmək üçün London Kral Kolleci 250 min insanın iştirak edəcəyi genişmiqyaslı tədqiqata başlayır./qaynarinfo
