Bakının iki küçəsinə nəzarət gücləndirildi
Bakının Cavadxan və Hüseynbala Əliyev küçələrinin kəsişməsindəki dairədə nəqliyyat vasitələrinin, o cümlədən sərnişin avtobuslarının və taksilərin xaotik hərəkətinin aradan qaldırılması məqsədi ilə Bakı Nəqliyyat Agentliyi (BNA) tərəfindən zəruri tədbirlər görülüb.
BNA-nın İctimaiyyətlə əlaqələr şöbəsinin sektor müdiri Mais Ağayev Sfera.az-a bildirib ki, sözügedən ünvanda mövcud avtobus dayanacaq məntəqələrinin xətləri yenidən rənglənərək müvafiq nişanlar qoyulub.
"Ərazidə taksilərin və avtobusların dayanacağa giriş-çıxışına maneə yaratmasının qarşısını almaq üçün yeni taksi duracağı yeri də müəyyənləşdirilib. Görülən infrastruktur tədbirləri ilə yanaşı BNA-nın əməkdaşları əraziyə nəzarəti də gücləndirib", - deyə qurum rəsmisi qeyd edib.
Onun sözlərinə görə, BNA paytaxtın digər küçə və prospektlərində də nəqliyyatın maneəsiz və təhlükəsiz hərəkətini təmin etmək məqsədi ilə zəruri tədbirləri davam etdirir.
