Yayda şəkərli içkilər niyə zərərlidir?
Yay aylarında isti havalarda susuzluğu aradan qaldırmaq üçün bir çox insan şəkərli qazlı içkilərə, hazır şirələrə və enerji içkilərinə üstünlük verir. Lakin bu cür içkilərin müntəzəm istifadəsi orqanizm üçün bir sıra mənfi təsirlərə səbəb ola bilər.
Sfera.az xəbər verir ki, mütəxəssislərin sözlərinə görə, şəkərli içkilər bədəni kifayət qədər nəmləndirmir. Əksinə, yüksək miqdarda şəkər qanda qlükoza səviyyəsinin sürətlə artmasına və daha sonra kəskin şəkildə düşməsinə səbəb ola bilər. Bu isə halsızlıq, yorğunluq və yenidən susuzluq hissi yarada bilər.
Yayda çox miqdarda şəkərli içki qəbul etmək çəki artımına da səbəb ola bilər. Belə içkilərin tərkibində yüksək miqdarda “boş kalori” olur və insan fərqinə varmadan gün ərzində normadan artıq kalori qəbul edir. Bu da piylənmə riskini artırır.
Şəkərli içkilərin həddindən artıq istifadəsi diş sağlamlığına da mənfi təsir göstərir. Tərkibindəki şəkər ağız boşluğunda bakteriyaların çoxalmasına şərait yaradır, diş çürüməsi və mina zədələnməsi riskini artırır.
Enerji içkiləri isə xüsusilə isti havalarda daha təhlükəli ola bilər. Onların tərkibindəki yüksək kofein və şəkər ürək döyüntüsünün artmasına, təzyiq dəyişikliklərinə və narahatlıq hissinə səbəb ola bilər.
Həkimlər yay aylarında əsas içkinin adi su olmasını tövsiyə edir. Susuzluğu azaltmaq üçün mineral su, şəkərsiz kompotlar, bitki çayları və təzə meyvələrdən hazırlanan təbii içkilərə üstünlük vermək daha faydalıdır.
Mütəxəssislər bildirirlər ki, xüsusilə uşaqlar, şəkərli diabet riski olan şəxslər və artıq çəki problemi yaşayan insanlar şəkərli içkilərin qəbulunu məhdudlaşdırmalıdır.\\axsam.az
