Avropada rekord istilər: temperatur tarixi həddə çatıb
Avropanı təsir altına alan güclü isti hava dalğası bir sıra ölkələrdə tarixi temperatur rekordlarının qeydə alınmasına səbəb olub. “Serberus” adı ilə tanınan bu isti hava kütləsi qitənin geniş ərazilərində havanın kəskin şəkildə qızmasına gətirib çıxarıb. Nəticədə bəzi bölgələrdə ölüm halları da qeydə alınıb. Artan risklər fonunda bir sıra tədbirlər təxirə salınıb, o cümlədən planlaşdırılan “Həddindən artıq istiyə cavab” adlı tədbir də ləğv edilib. Eyni zamanda, bir çox ölkədə rəsmi xəbərdarlıq səviyyələri maksimum həddə qədər yüksəldilib.
Sfera.az xəbər verir ki, Böyük Britaniya meteorologiya idarəsinin yaydığı məlumata əsasən, İngiltərənin cənub sahilində yerləşən Hempşir qraflığının Qosport şəhərində temperatur 36,1°C-yə yüksəlib. Bu göstərici ölkə üzrə iyun ayı üçün qeydə alınan ən yüksək temperatur kimi tarixə düşüb və uzunmüddətli meteoroloji müşahidələrdə mühüm rekord hesab olunur.
Qurumun sosial şəbəkə hesabında “Hələ bitməmişik!” ifadəsi ilə edilən paylaşımda yeni temperatur rekordunun qeydə alındığı təsdiqlənib. Bildirilib ki, Qosportda ölçülən 36,1°C temperatur Böyük Britaniyada iyun ayı üzrə bütün zamanların ən yüksək göstəricisidir və bu 1976-cı ildən bəri dəyişməyən əvvəlki rekordu da geridə qoyub.
Mütəxəssislər xəbərdarlıq edirlər ki, isti hava dalğasının yaxın günlərdə də təsirini davam etdirməsi gözlənilir. Bəzi regionlarda temperaturun daha da yüksəlməsi və ekstremal hava şəraitinin güclənməsi ehtimalı var. Buna görə də qırmızı səviyyəli hava xəbərdarlığının qüvvədə qalacağı bildirilir.
Ümumilikdə, Avropanın bir çox ölkəsində vəziyyətin gərgin olaraq qalacağı və əlavə tədbirlərin görülməsinin vacib ola biləcəyi qeyd edilir. Meteoroloqlar isə vətəndaşları xüsusilə günün ən isti saatlarında diqqətli olmağa və rəsmi xəbərdarlıqlara əməl etməyə çağırırlar.
Mənsumə