Mənzil təminatı sahəsində tətbiq olunan yeni sosial yanaşmalar cəmiyyətdə geniş müzakirələr doğurub. Qanunvericiliyə əsasən, xüsusi kateqoriyaya aid vətəndaşlar dövlət tərəfindən yaşayış sahəsi ilə təmin edilirlər.

Bəs kimlər dövlət hesabına mənzil ala bilər?

Sfera.az xəbər verir ki, məsələ ilə bağlı hüquqşünas Əliməmməd Nuriyev bildirir ki, qüvvədə olan qaydalara görə, imtiyazlı şəxslərin dövlət hesabına mənzillə təminatı birdəfəlik xarakter daşıyır.

Onun sözlərinə görə, vətəndaşlar dövlət mənzil fondundan yararlanmaq üçün yalnız bir dəfə növbəyə götürülə bilərlər. Bu mexanizmin əsas məqsədi şəxsi daha geniş və ya ideal yaşayış şəraiti ilə təmin etmək deyil, minimum yaşayış ehtiyacını qarşılamaqdır. Ailənin böyüməsi və ya mövcud şəraitdən narazılıq isə yeni hüquqi əsas sayılmır.

O qeyd edib ki, yalnız istisna və ciddi hallar zamanı təkrar müraciətlərə baxıla bilər:

"Məsələn, təbii fəlakət nəticəsində yaşayış sahəsi tam yararsız vəziyyətə düşərsə, bu, yeni hüquqi vəziyyət kimi qiymətləndirilə bilər. Lakin eyni səbəblə ikinci dəfə mənzil tələb etmək digər ehtiyacı olan şəxslərin hüquqlarına müdaxilə sayılır və sosial ədalət prinsipi ilə ziddiyyət təşkil edir".

Mövzu ilə bağlı Sosial Xidmətlər Agentliyindən verilən məlumata görə isə tətbiq olunan qaydalar həm sosial ehtiyacların qarşılanması, həm də dövlət resurslarının ədalətli bölüşdürülməsi məqsədi daşıyır. Qurum bildirir ki, əlilliyi olan şəxslər və şəhid ailələri daim diqqət mərkəzində saxlanılır və indiyədək bu kateqoriyadan olan 16 mindən çox şəxs dövlət tərəfindən mənzil və ya fərdi evlə təmin olunub.

Qeyd edək ki, mövcud qanunvericilik imtiyazlı şəxslərin dövlət hesabına mənzil təminatını birdəfəlik prinsip üzərində qurur və yalnız fövqəladə hallar istisna olmaqla təkrar müraciətlərə imkan verir.

Kimlər dövlət hesabına mənzil ala bilər? - Şərtlər açıqlandı