“Mənim Oğlum Qəhrəmandır!” layihəsinin klipi artıq qardaş Türkiyənin televiziya kanallarında yayımlanır, eyni zamanda radio məkanlarında səsləndirilir. Layihənin Türkiyə mediasında təqdim olunması Azərbaycan–Türkiyə qardaşlığının mənəvi bağlarını bir daha nümayiş etdirir.

Sfera.az xəbər verir ki, bu barədə layihənin rəhbəri, tanınmış şair Mircəlal Qurbanov məlumat verib.

Onun sözlərinə görə, Türk dünyasının sevilən sənətçisi Azərin və Azərbaycanın Xalq artisti Azər Zeynalovun ifasında səslənən “Mənim Oğlum Qəhrəmandır!” nəğməsi sadəcə musiqi əsəri deyil. Bu mahnı şəhid analarının göz yaşından doğulan dua, şəhid atalarının sınmayan duruşundan yaranan qürur kimi təqdim olunur.

Layihə müəlliflərinin vurğuladığı kimi, nəğmənin Türkiyə televiziya və radio məkanında səslənməsi xüsusi mənəvi məna daşıyır. Artıq qəhrəman anaların haqq səsi təkcə Azərbaycanda deyil, Türkiyədə də eşidilir, Türkiyə ekranlarında da yer alır. Şəhid analarının səsi millətin vicdan səsi kimi dəyərləndirilir. Mahnının hər misrasında bir ana nəfəsi, bir müqəddəs dua hiss olunur: “Mənim oğlum bu gün deyil, sabah deyil… O əbədi bir zamandır! Azərbaycanın tarixinə tarix yazan qəhrəmandır!”

Mircəlal Qurbanov qeyd edib ki, nəğmənin hər notunda göz yaşını qürura çevirən ata duruşu əks olunur və səslənən misralar türk qəhrəmanlıq ruhunu bir daha xatırladır: “Mənim oğlum Cavanşirdir… O Nəbidir, Koroğludur! Polad kimi vətəninə canın verən Türk oğludur!”

Onun sözlərinə görə, layihənin əsas mesajı ondan ibarətdir ki, Azərbaycan var olduqca qəhrəman şəhidlər də yaşayacaq, onların adları yaşadıqca Türkün qüruru və Vətənin bayrağı daim uca olacaq.

“‘Mənim Oğlum Qəhrəmandır!’ bu gün artıq təkcə bir mahnı deyil, Türk dünyasını birləşdirən mənəvi çağırış, şəhidlərin xatirəsinə ucaldılmış səsli abidədir”, – deyə Mircəlal Qurbanov fikirlərini yekunlaşdırıb.

“Mənim Oğlum Qəhrəmandır!” layihəsi qardaş Türkiyənin efirlərində