"Mənim namizədliyimi ləğv etdirdi" - AİF prezidenti Ramiz Mehdiyevdən yazdı
“Ramiz Mehdiyevin mənə etdiyi, bəlkə də etdiyi pisliklər arasında dəryada bir damla olub, amma edib”.
Sfera.az xəbər verir ki, bu haqda AİF prezidenti Osman Gündüz yazıb.
O 2005-ci ildə parlament seçkilərində başına gələnləri xatırladıb.
“Əvvəllər də bu haqda yazmışdım. 20 il bundan öncə, 2005-ci ilin elə bu vaxtlarında Balakəndə parlament seçkilərilə bağlı seçki kampaniyası keçirirdik. Deputat seçilmək şansım çox yüksək idi. Hər şey əla idi. Əsas alternativim də Rəbiyyət Aslanova idi. Ramiz Mehdiyevin ən yaxın adamı hesab olunurdu. Mənə namziədliyimi geri götürməyimlə bağlı təkliflər olsa da qəti imtina etmişdim.Əvvəldən də buradan deputat olan bu xanım heç seçicilərlə görüşlər belə keçirə bilmədi. Seçkiyə az qalmış ATƏT, hətta PA-dan gəlmiş sorğu keçirənlər mənim deputat olaraq seçilməyimi təbrik edirdilər”.
Onun sözlərinə görə, seçkiyə bir neçə gün qalmış Balakənin icra başçısı Ramiz Mehdiyev tərəfindən Bakıya çağırılıb və bundan sonra vəziyyət tam dəyişib:
“Seçkiyə təxminən bir neçə gün qalmışdı. İcra başçısı Bakıdan qayıdan anda hər şey dəyişdi. Rayonda ciddi gərginlik yarandı. Mənim adımın seçki bülletenində olmasının ciddi nəticələr verəcəyini düşünərək Dairə Seçki Komissiyası, təbii ki yuxarıdan əmrlə mənim namizədliyimin ləğvinə qərar verdi. Motiv də bu oldu ki mənim kənddə olan hansısa bir nümayəndəm seçicini ələ alıbmış. Ali Məhkəmədən çağırış gəldi və 5 dəqiqəlik məhkəmə ilə namizədliyim ləğv edildi. On minlərlə Balakən seçicisinin iradəsinə zidd olaraq Rəbiyyət Aslanova üçün (oğlu da o dövrdə Ramiz Mehdiyevin köməkçisi idi) rəqabətsiz seçki mühiti yaradıldı və sonra da deputat təyin edildi. Beləcə, mənim deputat mandatım, seçicilərimin səsi, iradəsi əlindən alındı.Baxmayaraq ki sonradan məhkəmədə üzə duranların bir çoxunun notarial təsdiqlə izahatları oldu ki, bu qurama işdən xəbərləri yoxdur. Amma artıq məsələ həll olunmuşdu”.
AİF prezidenti bildirib ki, illər sonra ədalətin bərpa olunması onu və 2005-ci il seçki komandasında çalışanları sevindirir:
“İndi isə görünür ki, baş verən bütün bu tip ədalətsizliklər, qanunsuzlar və saxtakarlıqlar üçün Ramiz Mehdiyevin hesabat vermək məqamı yetişib. Əminəm ki o zaman xeyli əziyyət çəkən seçki komandam, bizə dəstək verənlər, bütün Balakən seçiciləri də indi ədalətin zəfər çalmasından məmnundurlar. Gec olsa da”.
Bəsti Rəfizadə
Sfera.az
