Dünya Humanitar Yardım Günüdür
Avqustun 19-u hər il Dünya Humanitar Yardım Günü kimi qeyd olunur.
Sfera.az xəbər verir ki, 2003-cü ilin məhz bu tarixində Bağdadda BMT-nin ofisinə hücum edilib və nəticədə BMT-nin İraq üzrə xüsusi nümayəndəsi Serxio Vieyra de Mello da daxil olmaqla 22 nəfər həlak olub. 2008-ci ildə BMT Baş Assambleyası bu tarixi rəsmi olaraq humanitar fəaliyyətin önəmini xatırlamaq və həyatını başqaları uğrunda qurban verənlərin xatirəsini anmaq üçün qeyd olunan gün kimi təsis edib.
BMT məlumatlarına görə, hazırda dünyada 300 milyondan çox insan humanitar yardıma ehtiyac duyur. Müharibələr, iqlim dəyişikliyi, iqtisadi böhranlar və təbii fəlakətlər insanları daha həssas vəziyyətə salır, yardım təşkilatları isə təkcə maddi dəstək deyil, həm də ümidin qorunması üçün çalışırlar. Son illər humanitar işçilərə qarşı hücumların sayı da kəskin artıb. 2024-cü ildə 816 humanitar işçi hücumlara məruz qalıb, onlardan 383 nəfəri həyatını itirib. Bu, yalnız statistik göstərici deyil, insanlıq uğrunda həyatını təhlükəyə atanların necə böyük risklərlə üz-üzə qaldığını göstərir.
2025-ci ildə Dünya Humanitar Yardım Günü “Gücləndirilmiş Qlobal Həmrəylik və Yerli Cəmiyyətlərin Səlahiyyətləndirilməsi” şüarı ilə qeyd olunur. Bu mövzu yardım alan cəmiyyətlərin yalnız passiv tərəf deyil, həm də humanitar prosesin fəal iştirakçısı və qərarverici tərəfi kimi rolunu ön plana çıxarır. İnsanlara yardım etmək təkcə qlobal qurumların deyil, yerli təşəbbüslərin və fərdi səylərin də birgə işi kimi təqdim edilir.
Azərbaycan da humanitar yardıma xüsusi diqqət ayıran ölkələrdəndir. Təbii fəlakət və münaqişələr zamanı həm dövlət, həm də ictimai təşkilatlar tərəfindən yardımlar təşkil olunur. Azərbaycan Qızıl Aypara Cəmiyyəti bu sahədə mühüm fəaliyyət göstərərək zərərçəkmişlərə qida, tibbi ləvazimat, geyim və sığınacaq təmin edir. Ölkəmizin beynəlxalq humanitar təşəbbüslərdə iştirakı da diqqətəlayiqdir. Azərbaycan Suriyadan uşaqların təxliyəsində iştirak edib, Pakistanda və Türkiyədə baş verən zəlzələlərdən sonra yardım göndərib, Ukraynadakı müharibədən əziyyət çəkən mülki əhaliyə humanitar dəstək göstərib.
Bu fəaliyyətlər Azərbaycanın humanitar dəyərlərə sadiqliyini nümayiş etdirir və ölkəmizi beynəlxalq həmrəyliyin fəal iştirakçısına çevirir. Yerli və beynəlxalq səviyyədə atılan bu addımlar “insanlıq üçün insanlıq” prinsipini təsdiq edir. Humanitar Yardım Günü həm də ictimaiyyətə çağırışdır: hər kəs öz imkanları daxilində yardıma ehtiyacı olanlara dəstək ola bilər. Bu, ianə, könüllülük fəaliyyəti və ya sadəcə sosial şüurun artırılması ilə mümkün olur.
Bu günün fəlsəfəsi bir cümlə ilə ifadə olunur: heç kim geridə qalmasın. Dünya Humanitar Yardım Günü xatırladır ki, insanlıq ən çətin anlarda birliyini və həmrəyliyini qoruyaraq ayaqda qalır.
Firuzə Əliyeva
Sfera.az
