Son zamanlar uşaqlara qarşı zorakılıq halları xeyli artıb. Ən narahatedici məqamlardan biri isə bu halların bəzən yaşlı nəslin azyaşlılara qarşı törətməsidir. Bu isə həm ailələr, həm də cəmiyyət üçün böyük narahatlıq doğurur.

Belə halların qarşısının alınması üçün valideynlər uşaqları necə maarifləndirə bilər? Uşaqları nənə, babalara və ya başqa şəxslərə əmanət etmək nə dərəcədə doğrudur?

Sfera.az-a bu barədə açıqlama verən psixoloq Nizami Orucov uşaqlara qarşı zorakılığın artmasının, xüsusilə də bu halların ailəyə yaxın şəxslərin – nənə, baba və digər qohumlar tərəfindən baş verdikdə daha ciddi narahatlıq doğurduğunu bildirib.

Onun sözlərinə görə, belə halların qarşısını almaq üçün valideynlər ilk növbədə uşaqlara şəxsi sərhədləri başa salmalı, onların “bədənim mənə aiddir” prinsipi ilə böyüməsinə şərait yaratmalıdır:

“Uşaqlara “yaxşı və pis toxunuş”, “xeyirli və təhlükəli sirr” kimi anlayışlar sadə dillə izah edilməli, narahat olduqları hər şeyi rahatlıqla söyləyə biləcəkləri bir münasibət qurulmalıdır. Bu, uşağın həm özünü qorumasına, həm də çəkinmədən kömək istəməsinə imkan verir”.

Psixoloq əlavə edib ki, nənə, baba və digər şəxslərə uşaq əmanət edilərkən, bu münasibətə kor-koranə etibar edilməməli, müşahidə və diqqət hər zaman aktiv saxlanmalıdır:

“Təhlükə bəzən uzaqdan deyil, çox yaxınlardan gələ bilər. Ona görə də valideyn məsuliyyəti heç kimə tam ötürülməməlidir”.

Fidan Hacızadə
Sfera.az

Uşaqları zorakılıqdan necə qoruyaq? - Psixoloqdan AÇIQLAMA