Sürücülük vəsiqəsi yenilənəcək? - "On ildir ki, bu məsələ müzakirə edilir"

"Sürücülük vəsiqəsinin verilməsi qaydalarında hər hansı dəyişikliyin edilməsi gündəmdə deyil".

Bunu sürücülük vəsiqələrinin verilməsi prosesində dəyişikliklərin ediləcəyi ilə bağlı yayılan məlumatları Sfera.az-a şərh edən zaman nəqliyyat üzrə ekspert Elməddin Muradlı bildirib.

Onun sözlərinə görə, bu məsələ 10 ilə yaxındır müzakirə olunur:

“Bugünkü reallıq onu göstərir ki, bu sahədə bütün maddi-texniki vasitələr Dövlət Yol Polisinin əlindədir. Sistemə inteqrasiya etmək, yönləndirmək və lazım olan yenilikləri tətbiq etmək xeyli vaxt apara bilər. Hər gün yüzlərlə insan sürücülür vəsiqəsi almaq üçün müraciət edir. Bu vaxt elə tənzimlənməlidir ki, arada boşluq yaranmasın”. 

Mütəxəssis onu da bildirdi ki, əgər qaydalar dəyişəcəksə, bu məsələ həm də qanunvericilik səviyyəsində öz həllini taplamalıdır.

Qeyd edək ki, yayılan məlumatlara əsasən, ilk dəfə sürücülük vəsiqəsinin verilməsini də ASAN xidmət tərəfindən həyata keçiriləcək. Bununla yanaşı vəsiqənin əldə edilməsi üçün nəzəri imtahanları Dövlət İmtahan Mərkəzi (DİM), digər imtahanı isə Respublika Baş Dövlət Yol Polisi İdarəsi həyata keçirəcək. 

Firuzə Əliyeva
Sfera.az