Yay aylarında məhsul və xidmətlərə tələbatın artması fonunda istehlakçı hüquqlarının pozulması hallarında da ciddi artım müşahidə olunur. Bu, xüsusilə qida təhlükəsizliyi və xidmət keyfiyyəti ilə bağlı sahələrdə özünü göstərir. Qida məhsullarının düzgün saxlanılmaması, günəş altında satışa çıxarılması, soyuducu şəraitin olmaması və digər bu kimi hallar istehlakçıların sağlamlığı üçün risk yaradır.

Mövzu ilə bağlı Sfera.az-a açıqlama verən Azad İstehlakçılar Birliyinin sədri Eyyub Hüseynov bildirib ki, istehlakçını ən çox narahat edən və hüquqlarının pozulmasına səbəb olan hallar günəşin təsirinə məruz qalan məhsullarla bağlıdır.

Onun sözlərinə görə, Bakının Puşkin və Dilarə Əliyeva küçələrinin kəsişməsində yerləşən satış nöqtəsində su və şirələr birbaşa günəş şüaları altında saxlanılır:

“Xüsusilə plastik qablarda olan içkilərin bu şəkildə satılması yolverilməzdir və insan sağlamlığı üçün təhlükə yaradır”.

E.Hüseynov əlavə edib ki, yay aylarında çimərliklərlə bağlı da çoxsaylı şikayətlər daxil olur:

“Çimərliklərin ödənişli olması, hasarlanması və insanların öz qidalarını gətirməsinə icazə verilməməsi kimi hallar istehlakçı hüquqlarının pozulması faktıdır”.

Bundan əlavə, kənd təsərrüfatı məhsulları və ətin qiymətinin süni şəkildə artırılması da istehlakçılar arasında narazılıq doğuran əsas məsələlərdəndir.

Problemin həlli yolları

Ekspert bu problemlərin qarşısını almaq üçün bir sıra vacib tədbirlərin görülməsini tövsiyə edib:

"Qanunvericilik yenilənməlidir. İstehlakçıların hüquqlarının müdafiəsi haqqında” Qanun 1995-ci ildən dəyişdirilməyib və artıq müasir tələblərə cavab vermir. Mövcud qanun zəif olduğu üçün sui-istifadə halları baş verir. Monitorinqlər gücləndirilməlidir. Azərbaycan Qida Təhlükəsizliyi Agentliyi (AQTA) tərəfindən daha çevik və səmərəli yoxlamalar aparılmalıdır".

Firuzə Əliyeva
Sfera.az

Yayda istehlakçı hüquqları daha çox pozulur – Ekspert xəbərdarlıq edir