Yayda Bakının bəzi əraziləri susuz qalıb - Açıqlama

Yay fəslinin qızmar günlərində Bakının bəzi ərazilərində suyun fasilələrlə verilməsi müşahidə edilir. Hətta Qaraçuxur qəsəbəsində 10 gündür ki, suyun gəlmədiyi deyilir.

Məsələ ilə bağlı İri Şəhərlərin Birləşmiş Su Təchizatı Xidmətindən Sfera.az-a bildirilib ki, Bakı şəhəri və Bakıətrafı bəzi yaşayış ərazilərində müşahidə olunan su təchizatındakı fasilələr müəyyən səbəblərlə bağlıdır. 

Açıqlamada qeyd olunur ki, yay mövsümündə havaların isti keçməsi suya olan tələbi kəskin artırıb:

“Mövcud qurğuların və sudaşıyıcı kəmərlərin ifrat yüklənməsi nəticəsində qəza risklərini də minimuma salmaqla tələbatın maksimum optimal qarşılanması üçün tənzimlənmə işləri aparılır. 

Bakı şəhərinin əsas su təminatçısı olan Ceyranbatan, Oğuz-Qəbələ-Bakı, Kür sutəmizləyici qurğuları komplekslərində suyun istehsal həcmlərinin artırılması, sudaşıyıcı magistral kəmərlərin, hövzələr üzrə supaylayıcı şəbəkələrin, qurulması istiqamətində yeni layihələrin icrası intensiv şəkildə davam etdirilir. 
Hazırda da əksər ərazilərdə su təminatı normal rejimə qaytarılıb”.

Firuzə Əliyeva
Sfera.az