Bu xəstəliyə qarşı fövqəladə tədbirlər GÖRÜLDÜ
Türkiyədə heyvandarlıq sektoru təhlükə altındadır. Ölkədə ilk dəfə aşkarlanan SAT1 serotipi şap xəstəliyinə qarşı genişmiqyaslı mübarizə tədbirləri başlayıb. Kənd Təsərrüfatı və Meşəçilik Nazirliyi xəstəliyin yayılmasının qarşısını almaq məqsədilə ölkə üzrə 10 minə yaxın baytar həkimi səfərbər edib.
Yeni virusun yayılmaması üçün heyvan bazarları müvəqqəti bağlanıb, Şap İnstitutu tərəfindən 6 milyon doza qədər peyvənd istehsal olunaraq sahəyə göndərilib. Peyvənd istehsalı fasiləsiz rejimdə davam etdirilir və 20 iyula qədər əlavə 2,6 milyon doza peyvəndin daha göndərilməsi planlaşdırılır.
Şap xəstəliyinə qarşı tədbirlər 81 vilayət və 922 rayonda aparılır. Baytar həkimlər həm heyvanları peyvəndləyir, həm də təsərrüfatlarda nəzarət və analiz işləri görür. Nazirlik, yalnız rəsmi mənbələrdən gələn məlumatlara inanılmasını tövsiyə edərək, sosial mediada yayılan yanlış informasiyalara qarşı diqqətli olmağa çağırıb.
Heyvan bazarlarının nə vaxt açılacağı isə ərazilərdə peyvəndləmə işlərinin tamamlanma səviyyəsindən asılı olaraq mərhələli şəkildə müəyyən ediləcək. Nazirlik peyvənd ehtiyatının yetərli olduğunu və görülən tədbirlərlə bağlı ictimaiyyətin mütəmadi məlumatlandırılacağını bildirib./News24.az
