"Range Rover"in yeni loqosu bəyənilmədi
Məşhur britaniyalı avtomobil istehsalçısı Jaguar Land Rover (JLR) 55 illik tarixi olan Range Rover brendi üçün ilk dəfə rəsmi loqo təqdim edib. Lakin şirkətin bu addımı cəmiyyətdə birmənalı qarşılanmayıb.
Sfera.az xəbər verir ki, yeni loqo sosial şəbəkələrdə və dizayn mütəxəssisləri arasında tənqid olunub.
Yeni təqdim olunan loqo klassik “Range Rover” yazısını əvəz etmir. “Ikili-R” motivindən ibarət olan simvol, əsasən aksessuarlar, paltar etiketləri, interyer dizayn elementləri və reklam-təqdimat məkanları üçün nəzərdə tutulub. Avtomobilin üzərində əvvəlki geniş yazılı “Range Rover” loqosu eyni ilə qalacaq.
Şirkətin məqsədi Range Rover brendini digər modellərdən – Defender, Discovery və Jaguardan daha aydın ayırmaqdır. Bu strategiya “House of Brands” adlanır və hər avtomobil xəttinin öz simvol və üslubuna sahib olmasını nəzərdə tutur.
Amma görünən odur ki, yeni loqo ictimaiyyətdə gözlənilən effekti yaratmayıb. Sosial şəbəkə istifadəçiləri yeni loqonu kəmərə, musiqi albomu üz qabığına və ya “nonsens dizayna” bənzədiblər. “Creative Blog” kimi dizayn portalları bu dəyişikliyi “branding fəlakəti” adlandırıb. “MotorTrend” saytı isə bunu “goofy” – gülməli və ciddilikdən uzaq addım kimi dəyərləndirib.
Qeyd edək ki, Range Rover 1970-ci ildən bu günə qədər heç vaxt rəsmi loqo istifadə etməmişdi. Yeni simvol brendin ilk elektrik modellərinə keçid etdiyi dövrdə təqdim olunur. Bu baxımdan dəyişiklik həm də texnoloji dönüşü simvolizə etmək üçün nəzərdə tutulub.
Lakin görünən odur ki, şirkətin “müasirlik və orijinallıq” adına atdığı bu addım çoxları üçün nə dizayn baxımından, nə də emblematik güc baxımından inandırıcı olmayıb.
Firuzə Əliyeva
Sfera.az
