Son günlərdə hava şəraitinin dəyişkənliyi bəzi insanlar üçün xoş qarşılansa da, digərləri üçün mənfi təsir göstərir. Küləkli və ya yağışlı hava şəraiti istirahət etmək istəyənlərin planlarını təxirə salmasına və ya gecikdirməsinə səbəb olur.

Maraqlıdır ki, ölkədə hava şəraitinin belə olması insanlara psixoloji olaraq necə təsir edir?

Sözügedən məsələ ilə bağlı Sfera.az-a açıqlama verən klinik-psixoloq Gülşən Rüstəmova psixologiyamıza təsir göstərən çoxlu sayda təsiredici hadisələrin və proseslərin mövcudluğundan bəhs edib:

“Məsələn, yaşadığımız mühit, cəmiyyətdə baş verən dəyişikliklər, siyasi hadisələr, eləcə də qonşular arasında və ya iş yerində baş verən müxtəlif durumlar bizə birbaşa və ya dolayısı yolla təsir edir. Həmçinin hava şəraiti-günəşli, küləkli, yaxud insanı yorğun edən ağır hava həm fizioloji, həm də psixoloji baxımdan əhvalımıza təsir göstərir.

Psixoloq bunun həlli ilə bağlı bildirib ki, əgər desək ki, sadəcə havanın düzəlməsini gözləyək, yaxud hər şeyi yalnız hava və ya cəmiyyətlə əlaqələndirək, bu yanaşma adekvat sayılmaz:

“Əsas məsələ ondan ibarətdir ki, insan öz psixoloji sağlamlığı ilə məşğul olmalıdır. Çünki əgər psixoloji immunitetimiz zəifdirsə, istənilən tətikləyici amilə fərqli və bəzən həssas reaksiyalar verə bilərik”.

G.Rüstəmovanın sözlərinə görə, müəyyən hadisə və ya şəraitin bizə mənfi təsir etməsini istəmiriksə, ilk növbədə psixoloji davamlılığımızı gücləndirməliyik:

“Xüsusilə, hava şəraitinə görə əhvalı dəyişən insanlara məsləhətim budur ki, bir neçə alternativ məşğuliyyət nəzərdə tutsunlar. Məsələn, müxtəlif oyunlar oynasınlar, məşğələlərlə məşğul olsunlar və ya hobbilər tapsınlar ki, hava şəraitindən asılı olmadan diqqətlərini yayındıra bilsinlər. Bu cür fəaliyyətlər həm əhvalın stabilləşməsinə, həm də psixoloji tarazlığın qorunmasına kömək edir”.

Fidan Hacızadə
Sfera.az

Hava dəyişkənliyi psixoloji problemlərə yol aça bilər? - Psixoloqdan AÇIQLAMA