2025-ci ilin ilk 6 ayı Azərbaycan üçün həm inkişaf, həm də ağır itkilərlə yadda qaldı. İlin əvvəlindən bəri elm, mədəniyyət, tibb, siyasət və media sahələrində böyük xidmətləri olmuş bir sıra tanınmış simalar dünyasını dəyişdi. Onların hər biri cəmiyyətin ayrı-ayrı təbəqələrinə təsir etmiş, fəaliyyəti ilə yaddaşlara həkk olunmuş şəxslərdir.

Sfera.az bu yazıda 2025-ci ilin yanvar–iyun aylarında vəfat edən tanınmış azərbaycanlıları xatırladır.

Şəmsəddin Xanbabayev

Yanvar ayı ictimaiyyət üçün ağır itkilərlə başladı. 13 yanvarda Naxçıvanın sabiq baş naziri Şəmsəddin Xanbabayev 85 yaşında dünyasını dəyişdi. Onun adı uzun illər Muxtar Respublikanın dövlət idarəetməsi ilə bağlı xatırlanacaq.

Azər Baxşəliyev

İlin ilk həftəsində isə gənc yaşda vəfat edən aktyor Azər Baxşəliyevin itkisi də cəmiyyətdə üzüntü yaratdı. O, yanvarın 5-də, cəmi 39 yaşında dünyasını dəyişmişdi. Qeyd edək ki, A.Baxşəliyev uzun müddət böyrək çatışmazlığından əziyyət çəkib.

Çimnaz Sultanova

Yanvarın ayının 15-də aktrisa Çimnaz Sultanova həyatla vidalaşdı. O, bağırsaq xərçəngindən dünyasını dəyişib.

İlyas İsmayılov

Fevral ayında daha bir görkəmli siyasi fiqur olan sabiq ədliyyə naziri və millət vəkili İlyas İsmayılov həyatla vidalaşdı. 86 yaşında vəfat edən hüquqşünas müstəqillik dövründə ölkənin hüquqi sisteminə təsir edən əsas simalardan biri olub.

Həmin ay daha iki tanınmış şəxs – əməkdar rəssam Rəhim Əliağa oğlu Məmmədov və şair Ramiz Məmməd oğlu Məlikov 96 və 87 yaşlarında dünyasını dəyişdilər.

Tamilla Xudadat qızı Şirəliyeva

Mart ayı Azərbaycan mədəniyyətinə ağır zərbə vurdu. 12 martda Xalq artisti, tanınmış balet ustası və pedaqoq Tamilla Xudadat qızı Şirəliyeva vəfat etdi. Onun balet sənətinə verdiyi töhfələr illərlə səhnədə yaşamağa davam edəcək.

Ənvər Həsənov

Martın 16-da isə “Azərbaycanfilm”in rejissoru və aktyoru, Xalq artisti Ənvər Həsənov uzun sürən xəstəlikdən sonra 74 yaşında vəfat etdi. Həmçinin, tanınmış cərrah, “Əməkdar həkim” Məmili Süleymanov da martın sonunda gözlərini əbədi yumdu.

Rafiz İsmayılov

Aprel ayında Azərbaycan kinosunun əfsanəvi bədii quruluşçusu, Xalq rəssamı Rafiz İsmayılov 86 yaşında vəfat etdi. Kino sənətinə verdiyi töhfələr onu ekranlarda yaşadacaq.

Bu 6 ay ərzində 86 yaşlı aktyor, əməkdar artist Mövsüm Turbəndə oğlu Hüseynov (20 yanvar) da dünyasını dəyişənlər sırasında oldu. Onların vəfatı ictimaiyyət üçün gözlənilməz və sarsıdıcı oldu.

Yarım ilin bu qədər ağır itkisi Azərbaycan ictimaiyyətində dərin iz buraxdı. İtirdiyimiz bu dəyərli simalar təkcə yaxınlarının deyil, bütövlükdə xalqın yaddaşında yaşayacaq. Onların hər biri peşəkar fəaliyyəti və xalq üçün göstərdikləri xidmətlərlə xatırlanacaq.

Allah rəhmət eləsin!

Firuzə Əliyeva
Sfera.az

6 ayda itirdiyimiz MƏŞHURLAR