Şəxsiyyət vəsiqələrində mühüm DƏYİŞİKLİK – Yeni QANUN qəbul edildi

Azərbaycanda şəxsiyyət vəsiqəsinin üzərində olan məlumatlara şəxsin ünvanı da əlavə olunacaq. Bu, Milli Məclisdə müzakirəyə çıxarılan “Azərbaycan Respublikası vətəndaşının şəxsiyyət vəsiqəsi haqqında” qanuna təklif olunan dəyişiklikdə əksini tapıb.

Layihəyə görə, səyahət zamanı şəxsiyyət vəsiqəsinin üzərində şəxsin ünvanı barədə məlumatın əks olunmaması vəsiqənin istifadəsi üzrə bəzi çətinliklərə səbəb olur.
 

Bu baxımdan, şəxsiyyət vəsiqəsinin formasında və üzərində olan məlumatların dairəsində dəyişiklik edilməsi zərurəti yaranıb. Buna görə də şəxsiyyət vəsiqəsində əks olunan məlumatların tərkibinin yenilənməsi təklif olunur.

Təklif olunan digər dəyişiklik ondan ibarətdir ki, vətəndaşın ailə vəziyyəti, valideynləri, uşaqları, hərbi vəzifəsi və digər məlumatlar artıq birbaşa elektron daşıyıcıda deyil, IAMAS (idarələrarası avtomatlaşdırılmış məlumat-axtarış sistemi) vasitəsilə saxlanılacaq və kriptoqrafik mühafizə olunacaq. Şəxsiyyət vəsiqəsi ilə bağlı məlumatların kriptoqrafik mühafizəsi onların məxfiliyinin, bütövlüyünün və icazəsiz müdaxilədən qorunmasının təmin olunması məqsədini daşıyır.

Qeyd edək ki, Qanun layihəsi parlamentdə müzakirələrdən birinci oxunuşda qəbul edilib.

Bu yenilik nəyi dəyişəcək və hazırkı şəxsiyyət vəsiqələri qüvvəsini itirirmi?

Sfera.az xəbər verir ki, mövzu ilə bağlı Bizim.Media-ya danışan hüquqşünas Əkrəm Həsənov deyib ki, bu rahatlığa xidmət edir:

“Əvvəlki şəxsiyyət vəsiqələrində ünvan göstərilirdi. Yeni nəsil şəxsiyyət vəsiqələrində isə bu yoxdur. Belə başa düşürəm ki, əvvəlkinə qayıdırıq. Hesab edirəm ki, rahatlıqdır, ünvan göstəriləndə dərhal bu haqda məlumat verilir”.

Qanun layihəsinin qəbul olunması ilə indiki şəxsiyyət vəsiqələrinin qüvvədə qalıb qalmamasına gəldikdə isə ekspert bildirib ki,  bu məsələ qanunla tənzimlənir:

“Əgər qanunun özündə heç nə deyilməyibsə, qüvvədə qalacaq. Əgər qanunda deyilsə ki, qanun qüvvəyə mindikdən sonra və ya filan müddətdən sonra əvvəlkilər qüvvəsini itirir, onda həmin vəsiqələrin sahibləri şəxsiyyət vəsiqələrini dəyişməlidirlər”.