Baş naziri öldürən, soyqırım iddiası yayan və... - Ləğv olmuş TERROR TƏŞKİLATLARI
Xəbər verdiyimiz kimi, Tam adı Kürdüstan Fəhlə Partiyası olan PKK 2025-ci ilin iyulunda özünü rəsmən buraxaraq, silahı yerə qoyacağını elan edib.
Sfera.az bu mövzudan yola çıxaraq dünyanın ən tanınmış və tarixdə iz qoymuş, daha sonradan ləğv olunan terror təşkilatları, onların mənşəyi barədə araşdırmanı təqdim edir:
ASALA
Siyahının birinci sırasında erməni soyqırımı iddialarını tanıtmaq uğrunda yaradılmış terror təşkilatı olan ASALA-dır. Tam adı “Armenian Secret Army for the Liberation of Armenia” olan bu terror qruplaşması 1975-1990-cı illərə qədər fəaliyyətdə olub. Təşkilatın yaranma məqsədi Osmanlı dövründə baş verdiyi iddia edilən “erməni soyqırımı”nı tanıtmaq və “Böyük Ermənistan” qurmaq ideyası idi.
ASALA əsasən türk diplomatlarını və türk vətəndaşlarını hədəf alırdı. 1980-ci illərdə Fransa, İtaliya və Yunanıstanda partlayışlar və sui-qəsdlərlə gündəmə gəlib. ASALA-nın məqsədi Ermənistan adından beynəlxalq təzyiqlərlə Türkiyəyə siyasi güzəştlər etdirmək idi. 1983-cü ildə Parisdəki "Orly" hava limanında törətdikləri partlayış nəticəsində 8 nəfər öldü.
ETA
İspaniyada müstəqil Bask dövləti qurmaq məqsədi ilə yaradılmış növbəti terrorçu təşkilat isə ETA-dır. ETA İspaniyanın vətəndaşlarına qarşı 40 ildən çox davam edən terror kampaniyasında 800-dən çox adamı öldürüb. 1973-cü ildə İspaniya Baş naziri Carrero Blanconun öldürülməsi ilə təşkilat beynəlxalq diqqətə gəldi. 2011-ci ildə silahlı fəaliyyəti dayandırdı, 2017-ci ildə isə rəsmi şəkildə dağıldığını bəyan etdi.
PKK
Tam adı Kürdüstan Fəhlə Partiyası olan bu təşkilatın rəhbəri Abdullah Öcalan (həbsdə) idi. Təşkilatın məqsədi Kürd muxtariyyəti və ya müstəqilliyini əldə etmək idi.
1984-cü ildən Türkiyə dövlətinə qarşı silahlı mübarizə aparan PKK minlərlə insanın ölümünə səbəb olub. ABŞ, AB və NATO tərəfindən terror təşkilatı kimi tanınır. Hazırda Suriyanın şimalındakı PYD/YPG ilə əlaqəlidir. Lakin 2025-ci ilin iyulunda özünü rəsmən buraxaraq, silahı yerə qoyacağını elan edib.
Bəsti Rəfizadə
Sfera.az
