Boşanma hallarında təkcə emosional deyil, maddi məsələlərin də həlli çətinlik yaradır. Xüsusilə, nikah müddətində götürülmüş kreditlərin taleyi bir çox ailə üçün sual doğurur.

Ər-arvad boşanarkən krediti kim ödəyir? Məsələ ilə bağlı hüquqi mexanizmlər və məhkəmə təcrübəsi nəyi nəzərdə tutur?

Sfera.az xəbər verir ki, mövzu ilə bağlı açıqlama verən vəkil Turan Abdullazadənin sözlərinə görə, kredit müqaviləsi kimin adınadırsa, kreditor qarşılığında öhdəlikləri o icra etməlidir.

T.Abdullazadə nəzərə çatdırıb ki, bu barədə “Qanunvericiliyin tətbiqi təcrübəsi haqqında” Azərbaycan Respublikası Ali Məhkəməsi Pleniumunun 12 mart 2024-cü il tarixli qərarında qeyd olunub:

“Kredit müqaviləsi üzrə tərəf olan ərin və yaxud arvadın faktiki nikah münasibətlərinə xitam verildikdən və nikah pozulduqdan sonra kredit müqaviləsi üzrə öhdəliklərin qalan hissəsini ayrıca vəsaiti hesabına tam və ya qismən ödədiyi müəyyən olunarsa, ödəyən tərəf (ər və yaxud arvad) qarşı tərəfdən ödənilmiş məbləğin ümumi öhdəlikdəki paya uyğun hissəsini tələb edə bilər.

Bu zaman məhkəmə həmin şəxsin iddiasını təmin edə bilər. O da qeyd olunmalıdır ki, ər və ya arvaddan birinin bağladığı müqavilə üzrə əldə olunmuş vəsait ailə ehtiyaclarına sərf olunubsa, ər və arvad birlikdə kreditor qarşısında borclu qismində çıxış edirlər. Yəni, nikah dövründə ər və arvadın biri tərəfindən götürülmüş borc ailə ehtiyacları üçün sərf olunubsa, kredit müqaviləsi üzrə onların hər ikisi məsuliyyət daşıyır, hər ikisi borclu qismində çıxış edir və kredit müqaviləsi üzrə borcunu ödəməlidir”.

Firuzə Əliyeva
Sfera.az

Boşanmadan sonra krediti kim ödəyir? - AÇIQLAMA