Bu gün Azərbaycanda Polis Günüdür

Hər il 2 iyul tarixində Azərbaycanda Polis Günü qeyd olunur. Bu əlamətdar gün Azərbaycan polisinin yaranmasının, inkişafının və ölkənin təhlükəsizliyinin təmin olunmasında göstərdiyi xidmətlərin xatirəsinə həsr edilir.

Sfera.az xəbər verir ki, Azərbaycan polisinin əsası 1918-ci ildə, Azərbaycan Xalq Cümhuriyyəti dövründə qoyulub. Həmin ilin 2 iyulunda Daxili İşlər Nazirliyi strukturları yaradılmış və polis orqanları formalaşmağa başlamışdır.

Məhz buna görə, müstəqillik əldə edildikdən sonra 2 iyul tarixi rəsmi olaraq Azərbaycan Polisi Günü elan edilmişdir. Bu gün Azərbaycan polisi ictimai asayişin qorunması, cinayətkarlığa qarşı mübarizə, vətəndaşların təhlükəsizliyinin təmin olunması və dövlətin suverenliyinin müdafiəsində mühüm rol oynayır. Müasir dövrdə hüquq-mühafizə orqanlarının fəaliyyəti yalnız cinayətkarlığa qarşı mübarizə ilə məhdudlaşmır.

Polis əməkdaşları eyni zamanda fövqəladə hallarda əhaliyə yardım edir, sosial sabitliyin qorunmasına, insan hüquqlarının müdafiəsinə xidmət göstərir. Polis Günü münasibətilə hər il ölkədə müxtəlif tədbirlər, təltiflər, yubiley mərasimləri təşkil olunur. Dövlət rəhbərliyi, ictimaiyyət nümayəndələri polis əməkdaşlarını təbrik edir, onların çətin və məsuliyyətli xidmətini yüksək qiymətləndirirlər. Bu əlamətdar gün münasibətilə bütün polis əməkdaşlarına möhkəm can sağlığı, işlərində uğurlar, dövlətimizin təhlükəsizliyi naminə yorulmaz fəaliyyət arzulayırıq!

Fidan Hacızadə

Sfera.az