Qaraciyər xəstəliyini erkən aşkar edən süni intellekt hazırlandı

Osaka Universitetinin alimləri qaraciyərdə piy yığılmasını, yəni yağlı qaraciyər xəstəliyini erkən mərhələdə aşkar edə bilən süni intellekt sistemi hazırlayıblar.

Sfera.az “Gazeta.ru”ya istinadən xəbər verir ki, tədqiqat “Radiology Cardiothoracic Imaging” (RCI) jurnalında dərc olunub. Hazırda bu xəstəliyin diaqnozu ultrasəs, kompüter tomoqrafiyası (KT) və maqnit-rezonans tomoqrafiyası (MRT) ilə qoyulur. Lakin bu üsullar bahalıdır və xüsusi avadanlıq tələb edir. Alimlərin yaratdığı yeni süni intellekt modeli isə daha sərfəli və geniş istifadə olunan döş qəfəsinin rentgenoqrafiyasından (X-şüalarından) istifadə edir.

Rentgen müayinəsi qaraciyərin bir hissəsini göstərir və AI bu görüntülərdə yağlı qaraciyər əlamətlərini yüksək dəqiqliklə aşkarlaya bilir. Osaka Universitetindən professor Savako Uçida-Kobayaşi bildirib ki, adi rentgen müayinəsindən istifadə yağlı qaraciyər xəstəliyinin erkən aşkarlanmasını asanlaşdıraraq, diaqnostika xərclərini xeyli azalda bilər. Alimlər ümid edirlər ki, bu süni intellekt sistemi yaxın gələcəkdə tibbi praktikada geniş tətbiq olunacaq.

Fidan Hacızadə

Sfera.az