Kazino layihəsi haqda bir neçə kəlmə...

Dünən qaraguruhun, “söyüş müxalifəti”nin “stajlı” üzvlərindən biri (adını çəkib reklam etmək istəmirəm) Milli Məclisin plenar iclasında müzakirə olunan qanun layihəsi haqda söylədiklərimə istinad edərək və öz yöndəmsiz video-rolikinin üzərinə yekə şəklimi də pərçimləyərək belə başlıq çıxarmışdı: “Deputat kazinoları müdafiə edir”.

Təbii, bənzər reaksiyalar, ələlxüsus provokasiyalar, eyni zamanda mövzunu kontekstdən çıxarma cəhdləri hər zaman olub, bundan sonra da olacaq. Bizim missiyamız isə - həm hüquqşünas, həm siyasətçi kimi - məhz belə durumlarda doğru - düzgünləri cəmiyyətin diqqətinə çatdırmaq və insanları real mənzərə ilə tanış etməkdir.

Bu səbəbdən bəzi məqamları xatırlatmağı məqsədəuyğun bilirəm.

Əvvəla, sözügedən layihə illərdir müzakirə predmetidir və uzun məsləhətləşmələrdən sonra hazırki mərhələyə qədəm qoyub.

İkincisi... kazinoların fəaliyyətinə bütün ölkə ərazisində deyil, sadəcə süni yaradılmış adalarda icazə veriləcək və bu da o anlama gəlir ki, 90-larda imzalanmış fərmanın şərt(lər)ində xüsusi dəyişiklik yoxdur.

Üçüncüsü... Layihə əsasında və qanunvericilik qaydasında kazino fəaliyyəti ilə məşğul olacaq hüquqi şəxslərin vəzifə və öhdəlikləri dəqiqləşir, onlardan lisenziya (xüsusi icazə) tələb edilir və məlum sferada hüquqpozmalara görə ciddi məsuliyyət müəyyən olunur. Səbəb? Hədəf? Ki, saxta işbazlar, dələduzlar bu prosesdən faydalana bilməsin, insanlar aldanmasın və hər şey şəffaf, dürüst, qanuni məcarada dövr etsin.

Dördüncüsü... Dünyanın 156 ölkəsində leqal kazinolar var və həmin ölkələrin mütləq əksəriyyəti ya inkişaf etmiş, ya da inkişaf etməkdə olan ölkələrdir. Yəni, Azərbaycan bu əsnada istisna deyil və əgər biz dünyəvi dövlətiksə, dünyəvi prinsiplərə köklənmişiksə, o zaman ölkəmiz üçün çox vacib olan turizm sektorunu da dünyəvi formata istiqamətləndirməli, dünyəvi hərəkətliliyə uyğunlaşdırmalıyıq.

Beşincisi... Azart oyunlara meyl edən, bu yöndə pul xərcləmək və ya qazanmaq istəyən varsa, onsuzda həmin arzunu bir şəkildə reallaşdıracaq. Ha burda, ha xaricdə - fərq eləmir. Üstəlik, nəzərə alsaq ki, internet əsrində yaşayırıq və məhz həmin internet üzərindən təklif olunan mərc, qumar, kazino oyunları da yetərincədir, o zaman mövzudan yayınmaq, ya da kimisə yayındırmaq həqiqətən mümkünsüzdür.

Altıncısı... Statistika göstərir ki, kazino istifadəçilərinin təxminən 95 faizi adətən qeyri-ölkə vətəndaşları olur və çox güman, sırf psixoloji səbəblərdən dolayı həmin insanlar məxfiliyə, məsafəyə daha çox önəm verirlər. Bu nüans isə...həm də digər-paralel perspektivin ön işarəti kimi çıxış edir: Azərbaycan kazinoları müştəri qismində əsasən xariciləri qəbul edəcək və orada öz vətəndaşlarımızı çox nadir hallarda görə biləcəyik.

Nəhayət, yeddincisi...

Bu dəfə rəqəmləri işə salım.

Qonşu Gürcüstanda kazino dövriyyəsi 28 milyard (!) dollardır.

Çində, xüsusi ərazidə - Makaoda fəaliyyətinə icazə verilmiş kazinolardan gələn gəlir şəhər büdcəsinin 80 faizini təşkil edir.

Son dövrlər Qazaxıstan və Özbəkistan kazino sahəsini prioritet istiqamətlərdən biri kimi inkişaf etdirir və artıq onların bu sahədən əldə etdikləri illik qazanc 5 -7 milyard dollara yaxınlaşıb.

Sinqapur, Monako, Amerika (əsasən Las-Veqas), Kamboca də həmin qəbildən.

Hətta Birləşmiş Ərəb Əmirliklərində belə tezliklə dünya masştablı kazinonun açılacağı gözlənilir.

Odur ki...biz hələ gecikmişik və lazım olandan çox-çox daha artıq gözləmişik.

***

Qayıdıram, yazımın əvvəlinə.

Yəqin, o qaraguruhçu düşünüb, mən növbəti yazımda və ya açıqlamamda izah verəcəm ki, “Yox e, o cür demək istəməmişəm, fikirlərim təhrif olunub”.... filan-feşməkan.

Xeyr! Qətiyyən belə bir şey yoxdur və ola da bilməz!

Nə demişəmsə, necə demişəmsə, sözümün üzərində dayanıram!

Mən kazino layihəsini də, kazinoların açılmasını da ciddi bir şəkildə təqdir edirəm!

Çünki bu məsələyə ilk öncə sahibkarlığın inkişafı, yeni iş yerlərinin açılması, dövlət büdcəsinin əhəmiyyətli dərəcədə artımı rakursundan, yönündən baxıram!

Və mövzunu mübahisələndirmək arzusunda olan istənilən kəslə də debat aparmağa hazıram...

Elşən Musayev, Milli Məclisin deputatı, “Hüquq siyasəti və dövlət quruculuğu” komitəsinin sədr müavini.