Azərbaycanda bu yerlərdə yoxsulluq artır - Rəqəmlər

2024-cü ildə Azərbaycanda yoxsulluq həddi 270 manatı ötüb. 

Sfera.az Dövlət Statistika Komitəsinə istinadən xəbər verir ki, 2023-cü ildə 247 manat olan yoxsulluq həddi ötən ilin sonunda 270 manat təşkil edib. Bir ildə yoxsulluq həddində 23 manat, yəni 9,31 faiz artım baş verib. 

Yoxsulluq həddinin xeyli artması yoxsulluq səviyyəsinin də artımına səbəb olub. 2021-2023-cü illərdə yoxsulluq həddi davamlı azalaraq 6,2 faizdən 5,2 faizə endiyi halda 2024-cü ildə nisbət 5,3 faizə yüksəlib.

Yoxsulluq səviyyəsinin artması həm kişilər, həm də qadınlar arasında müşahidə edilib. 

Yaşayış yeri üzrə isə şəhərlərdə yoxsulluq səviyyəsi artdığı halda, kəndlərdə azalıb. Belə ki, bir ildə şəhərlərdə yoxsulluq səviyyəsi 3,9 faizdən 4,4 faizə yüksəlib, əvəzində kəndlərdə 6,8 faizdən 6,2 faizə düşüb. 

Ümumilikdə, şəhərlərdə son iki ildə yoxsulluq səviyyəsində artım müşahidə olunur. 2022-ci ildə 2,9 faiz olan yoxsulluq səviyyəsi ötən müddətdə xeyli dərəcədə yüksəlib. 

Kənd yerlərində isə əksinə 8,6 faizdən 6,2 faizə geriləyib. 

Vasif