Qloballaşma sürətləndikcə dünyanın müxtəlif ölkələrində yaşayan xalqlar üçün milli kimliyin qorunması çətinləşir və prioritet məsələyə çevrilir.

Sfera.az bildirir ki, informasiya axınının sərhədsizləşdiyi, mədəni sərhədlərin zəiflədiyi bir zamanda milli dəyərləri qoruyub saxlamaq təkcə tarixi mirasa sədaqət deyil, həm də milli varlığın davamlılığını təmin edən strateji zərurətdir. Bu kontekstdə xaricdə yaşayan azərbaycanlıların öz dilini, mədəniyyətini və Vətənə bağlılığını yaşatmaq istiqamətində göstərdiyi səylər mühüm rol oynayır. Ən əsası isə Prezident İlham Əliyevin rəhbərliyi ilə həyata keçirilən uğurlu və çoxşaxəli diaspor siyasəti, Qarabağa qazanılan möhtəşəm qələbə xaricdəki soydaşlarımız üçün mənəvi dayaq nöqtəsinə çevrilib.

Xaricdəki azərbaycanlıların yumruq kimi birləşməsindən danışırıqsa, Diasporla İş üzrə Dövlət Komitəsinin sədri Fuad Muradovun xaricdəki icmalarımızla son görüşlərinə diqqət çəkmək yerinə düşər.

Komitə rəhbərliyinin Ərəb ölkələri, Belçika, Niderland və Lüksemburq kimi ölkələrə etdiyi son səfərlər çərçivəsində təşkil olunan görüşlərə ümumilikdə yüzlərlə soydaşımız qatılmışdı. Artıq komitənin təşəbbüsü və dəstəyi ilə xaricdə keçirilən hər bir tədbirdə yüzlərlə soydaşımızı eyni məkanda görmək adi hala çevrilib. Bu, maraqlı göstəricidir, lakin statistik göstərici deyil. Bu, xaricdəki azərbaycanlılarla əlaqələrin uğurla qurulmasının, milli birliyin, Vətənə inamın və dövlətə sonsuz güvənin real təzahürüdür.

Bu tədbirlər artıq bir tendensiyanı ortaya qoyur ki, Azərbaycan diasporu sistemli şəkildə təşkilatlana, geniş coğrafiyada fəallaşa bilir, yaşadıqları ölkədən, fəaliyyət göstərdikləri mühitdən və sosial mövqelərindən asılı olmayaraq milli həmrəyliyi nümayiş etdirir. Azərbaycanlılar harada yaşamalarından asılı olmayaraq bir mərkəz ətrafında birləşməyi bacarır, dövlətin diaspora verdiyi dəstəyi yaxından hiss edərək birlik və həmrəylik içində fəaliyyət göstərirlər.

Azərbaycan diasporu bu gün təkcə milli dəyərlərin daşıyıcısı deyil, eyni zamanda ölkənin maraqlarını beynəlxalq miqyasda müdafiə edə bilən güclü ictimai resursa çevrilib. Müxtəlif ölkələrdə keçirilən mədəni tədbirlər, informasiya müharibəsində göstərilən fəallıq və yerli cəmiyyətlərlə qurulan körpülər bu fəaliyyətlərin konkret nəticələridir.

Bir haşiyəyə çıxaq ki, Diaspor Komitəsi son illər olduqca maraqlı layihələr həyata keçirir. Bu layihələr sayəsində diaspor mövzusu ölkə daxilində də xeyli populyarlaşıb, yüzlərlə azərbaycanlını cəmiyyətimiz onların hesabına tanıyıb. Diaspor Gənclərinin Yay Düşərgələri, xaricdə yaşayan alimlərin, həkimlərin forumları, diasporun mütəmadi olaraq Qarabağa gətirilməsi Azərbaycanda böyük maraqla qarşılanır.

Gəlinən qənaət odur ki, Azərbaycanın beynəlxalq nüfuzunun artması və siyasi-iqtisadi mövqelərinin möhkəmlənməsi diasporumuzun fəaliyyətinə də müsbət təsir göstərib. Vətən müharibəsi dövründə və sonrasında diaspor nümayəndələrinin Azərbaycanı dəstəkləyən təşəbbüsləri, informasiya savaşındakı aktivliyi və ictimai dəstək kampaniyaları bu vətənpərvərliyin təzahürü oldu. Bu gün həmin dinamika qorunur və daha da genişlənir. Güclü dövlət – güclü diaspor konsepsiyası artıq bir şüar deyil, real fəaliyyət modelidir.

Bu gün asanlıqla deyə bilirik ki, xaricdə yaşayan azərbaycanlılar dövlətin dəstəyini daha yaxından hiss edir, özlərini tək deyil, bütöv Azərbaycan xalqının ayrılmaz hissəsi kimi görürlər. Dövlətin diaspor siyasəti soydaşlarımızın yaşadıqları ölkələrdə sosial və iqtisadi sahələrə inteqrasiyasını da dəstəkləyir. Onların hüquqlarının qorunması, yerli cəmiyyətlərdə fəal və nüfuzlu fərdlərə çevrilməsi, həm fərdi inkişafları, həm də Azərbaycan mədəniyyətinin tanıdılması baxımından xüsusi önəm daşıyır.

Nəticə etibarilə, diasporumuz bu gün milli kimliyi qorumaqla yanaşı, Vətənlə bağlarını möhkəmləndirən, mədəniyyətimizi təbliğ edən və milli maraqları müdafiə edən güclü bir şəbəkədir. Dövlətin bu istiqamətdə yürütdüyü doğru və çevik siyasət bu uğurların əsas təməlini təşkil edir.

Minlərlə azərbaycanlı, tək missiya - Məqsəd BİRLİKDİR