1a:T73b,

Yay aylarının başlaması ilə birlikdə havaların isinməsi və günəşli günlərin artması insan sağlamlığına, xüsusilə də dərinin vəziyyətinə birbaşa təsir göstərir. Uzun müddət günəş şüalarına məruz qalmaq dəri yanığına, ləkələrin yaranmasına, dərinin vaxtından əvvəl qocalmasına və hətta bəzi hallarda dəri xərçəngi riskinin artmasına səbəb ola bilər.

Bu aylarda insanlar dəri xəstəliklərindən və ya şüadan qorunmaq üçün hansı tədbirlər görə bilər?

Bununla bağlı Sfera.az-a açıqlama verən dermatoloq Tünzalə Əzizli yay aylarında insanların xüsusilə günəşin zərərli təsirlərindən qorunmağa diqqət yetirməli olduqlarını bildirib.

Dermatoloq günəşdən qoruyucu kremlərdən istifadənin əhəmiyyətli olduğunu və bunun düzgün şəkildə tətbiqinin vacibliyini vurğulayıb.

O qeyd edib ki, günəşə çıxmazdan təxminən 20-30 dəqiqə əvvəl qoruyucu krem çəkilməli və əgər açıq havada uzun müddət qalınacaqsa, həmin məhsul hər 2-3 saatdan bir təzələnməlidir:

“Bundan əlavə, günəş şüalarından qorunmaq üçün müvafiq geyimlərdən istifadə etmək tövsiyə olunur-məsələn, gün eynəkləri, papaq, şlyapa və ya uzunqollu yüngül parçadan hazırlanmış paltarlar. Xüsusilə günəşə qarşı həssas dərisi olan insanlar bu tədbirlərə daha çox önəm verməlidirlər”.

Fidan Hacızadə
Sfera.az

Yay gəldi, dərd gəldi - Dəri problemlərindən necə qorunaq?