Qalmaqallarla gündəmdən düşməyən "Laser Beauty Klinikası"nın estetik kosmetoloqu Rəna Soltanova yenidən diqqət mərkəzinə gəlib. Uğursuz estetik müdaxilələri ilə bir çox qadının həyatına mənfi təsir göstərmiş kosmetoloq bu dəfə medianı hədəfə alıb.

Son günlərdə növbəti uğursuz əməliyyatın qurbanı olmuş pasiyentin şikayətinin mediada geniş işıqlandırılması Rəna xanımın xoşuna gəlməyib. O, "Instagram" hesabında paylaşım edərək media nümayəndələrini hədələyib, onun fotosunu dərc edən mətbu orqanlar barədə hüquq-mühafizə orqanlarına müraciət edəcəyini bildirib. Hətta daha da irəli gedərək jurnalistlərin həbs olunmasını tələb edib. Lakin unudur ki, jurnalistlərin fəaliyyəti qanunvericilik çərçivəsində tənzimlənir və onların həbsi fərdi arzulara əsasən mümkün deyil.

Rəna Soltanova daha sonra BBC-yə məxsus görüntünü paylaşaraq, Azərbaycan mediasını daim ölkəmiz haqqında qərəzli xəbərlər yayan BBC kimi olmağa çağırıb. Amma Rəna xanım unudub ki, Azərbaycana qarşı qərəzli münasibətə, ölkəmiz barədə həqiqətə uyğun olmayan xəbərlər yaydığına görə BBC-nin Azərbaycandakı nümayəndəliyi Xarici İşlər Nazirliyi tərəfindən ləğv edilib.

İndi isə Rəna xanım Azərbaycan mediasını məhz bu mətbuat qurumu kimi olmağa çağırır. Bunun da səbəbi bəllidir. Rəna xanımın etdiyi uğuruz estetik əməliyyatlarla bağlı yazılar xoşuna gəlməyib. Buna görə də dövlətimizi və dövlətçilimiyizi daim dəstəkləyən mediamızın bəyənmir və BBC kimi olmasını istəyir. Amma aldığı mükafatları (ödənişli və ya ödənişsiz, orasını biz deyə bilmərik) Azərbaycan mediası vasitəsi ilə təbliğ etdirən, Səhiyyə Nazirliyi işlədiyi klinikada yoxlama aparıb qanunsuzluqları üzə çıxaran zaman Azərbaycan mediasına müsahibə verib, özlərini müdafiə edən Rəna xanım bu gün həmin medianı bəyənmir, təhdid edir, jurnalistlərin həbs olunmasını istəyir. Azərbaycan demokratik respublikadır, söz və mətbuat azadlığı var. Medianın işi isə şikayətləri, problemləri araşdırıb, ictimaiyyətə təqdim etməkdir. Media müvafiq qanunlarla fəaliyyət göstərir və işi müvafiq qurumlar tərəfindən tənzimlənir.

Azərbaycan mediası təkcə fərdi halları deyil, həm də sağlamlıq, təhsil, ətraf mühit və hüquqi məsələlərdə cəmiyyətin maariflənməsi üçün mühüm işlər görür. Xüsusilə pandemiya dövründə əhalini düzgün məlumatlandırmaqda aktiv rol oynadı. Televiziya və yazılı media vasitəsilə milli-mədəni dəyərlər, tarix və ədəbiyyat mövzularının təbliği aparılır. Xüsusi veriliş və rubrikalarla gənc nəsildə milli kimlik hissinin güclənməsinə töhfə verilir. Media sosial ədalətsizlik, əlillərin hüquqları, aztəminatlı ailələr və region problemlərini gündəmə gətirərək onların həllinə çalışır.

Media orqanları, xüsusilə internet platformaları Ermənistan-Azərbaycan münaqişəsi ilə bağlı faktları xarici auditoriyaya çatdırmaq üçün böyük kampaniyalar aparıb, haqq səsimizi bütün dünyaya çatdırıb, ermənilərin Xocalı və başqa bölgələrimizdə törətdiyi vəhşilikləri dünyaya tanıdıb, 44 günlük Vətən müharibəsi dövründə dövlət rəhbərliyimiz və əsgərlərimizlə çiyin-çiyinə dayanıb.

Azərbaycan mediasına ən yaxşı qiyməti hər zaman Prezident İlham Əliyev verib. Jurnalistləri özünün dostu adlandıran dövlət başçısı daim onların problemləri ilə maraqlanır, sosial problemlərinin həlli üçün müvafiq göstərişlər verir. Qarşıdan Milli Mətbuatın 150 illik yubileyi gəlir. Prezident İlham Əliyev də 2025-ci ildə "Azərbaycan Milli Mətbuatının 150 illik yubileyinin qeyd edilməsi haqqında" sərəncam imzalayıb. Sərəncamda yubileyin dövlət səviyyəsində qeyd edilməsi, tədbirlər planının hazırlanması və media nümayəndələrinin təşviqi tapşırılıb.

Göründüyü kimi, Azərbaycan mediası Rəna Soltanovanın gördüyü kimi bərbad vəziyyətdə deyil. Əksinə, öz işini görür və dövlət tərəfindən də lazımi qiymətini alır.

Rəna Soltanova və işlədiyi "Laser Beauty Klinikası"na gəlincə, adları daim qalmaqallarda, uğursuz əməliyyatlarda hallanır. Bunu rəsmi qurumlar da dəfələrlə təsdiqləyib və klinikanın fəaliyyətini dayanırıb. Belə ki, 22-23 yanvar 2025-ci tarixlərində Səhiyyə Nazirliyinin Analitik Ekspertiza Mərkəzi (AEM) klinikada planlı yoxlama aparıb və aşağıdakı nöqsanları aşkarlayıb:

* Tibbi sənədlərin düzgün aparılmaması;
* Avadanlıqların sertifikatsız olması;
* Temperatur ölçmə qeydiyyatının aparılmaması;
* Radioloji-gigiyenik pasportun təqdim edilməməsi;
* Cərrahi və stomatoloji xidmətlərin lisenziyasız göstərilməsi;
* 30-dan çox şəxsin sertifikatsız işləməsi.

Bundan əlavə, Rəna Soltanovanın yoxlama heyətinə qarşı qeyri-etik davranış sərgilədiyi, onlara qışqırdığı və fiziki hədə tətbiq etdiyi də bildirilir. O, bu iddiaları "absurd" adlandırıb, "emosional reaksiya" ilə izah etsə də, AEM bu davranışı səlahiyyətlərin aşılması kimi qiymətləndirib.

2023-cü ildə klinikanın "Neapol" filialında estetik əməliyyat zamanı Azərbaycanın Xalq artistlərindən birinin gəlininin səhhətinin ağırlaşaraq komaya düşməsi də geniş rezonans doğurmuşdu. Bunun kimi onlarla misal var və bundan əvvəlki yazılarda onlarla bağlı dəfələrlə məlumat vermişik. Bu, klinikadakı nöqsanların və qeyri-peşəkarlığın bariz nümunələrindən biridir.

Bütün bu faktlar ortada ikən Rəna Soltanovanın medianı ittiham etməsi, jurnalistləri hədəfə alması məsuliyyətdən yayınmaq və diqqəti əsas problemlərdən yayındırmaq cəhdidir...

(Milliyol.az)

Rəna Soltanova Azərbaycan mediasını təhdid etdi - FOTOFAKT