“Azərbaycanın taleyini dəyişən gün: 15 İyunun strateji əhəmiyyəti”- FOTOLAR
Yeni Azərbaycan Partiyası (YAP) Yasamal rayon təşkilatı və Yasamal Rayon İcra Hakimiyyətinin birgə təşkilatçılığı ilə “Konstitusiya və Suverenlik İli” çərçivəsində 15 İyun-Milli Qurtuluş Gününə həsr olunmuş “Azərbaycanın taleyini dəyişən gün: 15 İyunun strateji əhəmiyyəti” mövzusunda tədbir keçirilib.
Sfera.az xəbər verir ki, bu barədə Milli Məclisin deputatı Ülvi Quliyev facebook səhifəsində paylaşım edib.
Məlumata görə, əvvəlcə Ümummilli Lider Heydər Əliyevin büstü önünə gül dəstələri düzülüb, Ulu Öndərin xatirəsi dərin ehtiramla yad edilib.
Tədbirdə Azərbaycan Respublikasının Dövlət Himni səsləndirilib. Ulu Öndər Heydər Əliyevin, torpaqlarımızın azadlığı və suverenliyi uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.
Sonra 15 İyun - Milli Qurtuluş Gününə həsr olunmuş videoçarx təqdim edilib.
Tədbirdə çıxış edən YAP Yasamal rayon təşkilatının sədri Bəxtiyar Nəbiyev, Azərbaycan Respublikası Milli Məclisi sədrinin müavini Ziyafət Əsgərov, YAP Veteranlar Şurasının üzvü, məşhur “91-lər” dən biri Şahlar Əsgərov və Yasamal Rayon İcra Hakimiyyətinin başçısı Elşad Həsənov qeyd ediblər ki, 1993-cü il iyunun 15-i Azərbaycan tarixində dönüş nöqtəsi olmaqla, dövlətçiliyimizin xilas və inkişaf yolunun başlanğıcı kimi qəbul edilir. Məhz həmin gün xalqın təkidli tələbi ilə Ümummilli Lider Heydər Əliyevin yenidən hakimiyyətə qayıdışı Azərbaycanın parçalanmaqdan, vətəndaş müharibəsindən və xaosdan xilasını təmin etdi.
Ulu Öndərin hakimiyyətə qayıdışı ilə hüquqi dövlət quruculuğu, ordu və təhlükəsizlik sisteminin formalaşdırılması, xarici siyasətdə balanslı kurs və ən əsası, milli birliyin təmin olunması istiqamətində əhəmiyyətli addımlar atıldı. Ulu Öndər Heydər Əliyevin təşəbbüsü və siyasi iradəsi ilə 1995-ci ildə ümumxalq səsverməsi yolu ilə Konstitusiya qəbul olundu.
Çıxışlardan sonra rayonun ictimai-siyasi həyatında fəal iştirak edən partiya üzvlərinə fəxri fərman, YAP sıralarına yeni qoşulanlara üzvlük vəsiqələri təqdim edilib.
Sonra Yeni Azərbaycan Partiyasının Himni səsləndirilib.
Tədbir bədii hissə ilə davam edib.
