Avtobus dayanacaqlarına niyə ad qoyulmur? - Rəy

Azərbaycanda ictimai nəqliyyatın təşkili sahəsində müasir texnologiyalardan istifadə artsa da, hələ də müəyyən praktik məsələlər öz həllini tapmayıb. 

Sfera.az xəbər verir ki, iqtisadçı-ekspert Samir Əliyev bu mövzuda maraqlı məqama toxunub. Onun fikrincə, ölkədəki avtobus dayanacaqlarının adlandırılmaması sərnişinlər, xüsusilə də turistlər üçün çətinlik yaradır.

“Xarici ölkələrdə, xüsusilə Avropada avtobus dayanacaqlarının konkret adlarla adlandırılması geniş yayılıb. Bu həm yerli əhali, həm də şəhərlə yeni tanış olan əcnəbilər üçün ciddi rahatlıq yaradır”, – deyə Samir Əliyev bildirib.

Ekspertin sözlərinə görə, “Google Maps” və digər naviqasiya tətbiqlərindən istifadə edən sərnişinlər üçün dayanacaq adlarının olması olduqca vacibdir:

“Xəritə tətbiqləri dayanacaq adları ilə işləyir. Dayanacaqda hansı istiqamətdə hansı marşrutun keçdiyini anlamaq üçün bu məlumatlar çox kömək edir”.

Bəziləri bütün dayanacaqlara ad tapmağın çətin olduğunu iddia edə bilər. Lakin S.Əliyev qeyd edir ki, əslində kart sistemi ilə işləyən bütün avtobusların monitorlarında dayanacaqlar şərti adlarla göstərilir:

“Bu adlar çox vaxt həddindən artıq uzundur və əcnəbi turistlər üçün anlaşılmazdır. Halbuki qısa və məntiqli adlandırma sistemi ilə həm yerli əhali, həm də turistlər üçün naviqasiya prosesi asanlaşdırıla bilər”.

Ekspert qeyd edir ki, bu məsələni müvafiq dövlət qurumları, xüsusilə Bakı Nəqliyyat Agentliyi və ya AYNA kimi qurumlar gündəmə gətirə bilər. “Əgər məqsəd ictimai nəqliyyatı daha funksional və istifadəçi dostu hala gətirməkdirsə, dayanacaqların adlandırılması vacib mərhələlərdən biridir”, – deyə S.Əliyev vurğulayıb.

Bəsti Rəfizadə
Sfera.az