1a:T79b,

Ölkə üzrə sənədsiz evlərin bir çoxu kənd təsərrüfatı təyinatlı torpaqlarda tikilib.

Sfera.az "Report"a istinadən xəbər verir ki, bunu Milli Məclisin regional məsələlər komitəsinin bu gün keçirilən iclasında komitə sədri Siyavuş Novruzov deyib.

Onun sözlərinə görə, sənədsiz evlərin sənədləşdirilməsi ilə bağlı Prezidentin göstərişi olub:

“Sənədsiz evlərlə bağlı məsələdə obyektiv və subyektiv səbəblər var. Hazırda sənədsiz evlərin obyektiv səbəblərindən biri ondan ibarətdir ki, o evlərin bir çoxu kənd təsərrüfatı təyinatlı torpaqlarda tikilib. Təbii ki, bundan ən çox ziyan çəkən bələdiyyələrdir.

Çünki onlar bələdiyyələrə əmlak və torpaq vergisi vermirlər, bununla da bələdiyyələrin büdcəsinin formalaşmasında rol oynamırlar. Bu torpaqlarda tikilən evlərin sənədləşdirilməsi üçün torpağın kateqoriyası dəyişməlidir. Bunun üçün də 5-6 nazirlikdən icazə alınmalıdır. Bu, çox uzun prosesdir".

S.Novruzov sənədsiz evlərlə bağlı problemin tezliklə həll olunmasının vacibliyini vurğulayıb:

"Digər tərəfdən, bu evlərin bir hissəsi SOCAR-a məxsus olan neftli ərazilərdə tikilib. SOCAR həmin evlərin sənədləşdirilməsi üçün sakinlərə xüsusi məktub verməlidir. Bundan başqa, sənədsiz evlərin bir çoxu yüksək gərginlikli elektrik xətlərinin altında, yaxud da dəmiryolu kənarında tikilib.

Artıq sənədsiz evdə yaşayanları qeydiyyatdan da çıxarırlar. Bu baxımdan, bu məsələnin həlli üçün komitə olaraq nə bacarırıqsa, köməklik etməyə çalışırıq".

Sənədsiz evlərin bir çoxu kənd təsərrüfatı torpaqlarında tikilib - Komitə sədri