İlin bütün fəsillərində, azyaşlılardan böyüklərə qədər müxtəlif sağlamlıq problemləri ortaya çıxır. Son dövrlərdə uşaqlar arasında qripə oxşar virus infeksiyalarının geniş yayıldığı müşahidə olunur. Körpə və uşaqlarda xəstəliyin şiddəti onların immun sisteminin gücünə görə fərqlənir.

Uşaqları viruslardan necə qorumaq olar? Onların yoluxmaması üçün nə etmək lazımdır və xəstəliyi yüngül keçirməsinə görə əvvəlcədən hansı addımlar atılmalıdır?

Mövcud suallarla bağlı Sfera.az-a açıqlama verən professor, həkim Adil Qeybulla təəssüf ki, respirator infeksiyalardan qorunmağın hələ də tam optimal yolunun
müəyyənləşdirilmədiyini deyib.

Onun sözlərinə görə, bu infeksiyalar hava-damcı yolu ilə keçdiyindən, qorunmaq üçün maskadan düzgün istifadə etmək, əlləri təmiz saxlamaq və sosial məsafəni qorumaq vacibdir:

“Bu qaydalar bizə karantin dövründən tanışdır. Lakin bütün bu tədbirlər riskin qarşısını tam şəkildə ala bilmir. Əsas məsələ bu vasitələrdən düzgün və məqsədəuyğun şəkildə istifadə olunmasıdır. Maska növü düzgün seçilməli, onun istifadəsi zamanı gigiyena qaydalarına riayət edilməli və maskanın ağızda qalma müddəti nəzarətdə saxlanılmalıdır. Maskalar burun və ağız boşluğunu tam örtməlidir. Bu üsullar effektiv sayılsa da, yoluxmaların qarşısını tam şəkildə almağa kifayət etmir”.

Həkim uşaqlar bu cür infeksiyalardan qorumaqda ən mühüm addım kimi vaxtında peyvənd edilməyi göstərib.

A.Qeybulla vurğulayıb ki, Ümumdünya Səhiyyə Təşkilatının tövsiyəsinə əsasən, uşaqlara müxtəlif yaş dövrlərində 13 adda peyvənd tətbiq edilməlidir:

“Son illərdə bu prosesi daha da sadələşdirmək üçün bir neçə peyvəndin tərkibi bir dozada birləşdirilərək hexa və ya penta peyvənd formasında uşaqlara tətbiq olunur. Bu, həm rahat, həm də effektivdir. Peyvəndlərdən çəkinmək və onların əleyhinə olan təbliğata aldanmaq doğru yanaşma deyil”.

Müsahibimiz qızılcanın son dövrlərdə yenidən yayılması və bu xəstəliyin Azərbaycanda da ciddi problemlərə səbəb olmasının bir çox valideynin vaxtında övladlarını peyvənd etdirməməsi ilə bağlı olduğunu bildirib:

“Bu səbəbdən uşaqların sağlamlığını qorumaq və immun sisteminin güclü olmasını təmin etmək üçün peyvənd prosedurlarını vaxtında və düzgün şəkildə yerinə yetirmək mühüm əhəmiyyət daşıyır. Vaksinasiya nəticəsində uşaqların qrip və bəzi pnevmoniya törədicilərinə qarşı müqaviməti artır, immun sistemi bu infeksiyalara qarşı daha dayanıqlı olur”.

Fidan Hacızadə
Sfera.az

Uşaqların xəstələnməməsi üçün BUNLARI EDİN - HƏKİM RƏYİ