Əmisi Ceyhunun izi ilə gedən və onun adını daşıyan şəhid! – Ordubadda bir ailənin iki şəhidi yad edildi - VİDEO/FOTO

“Ordubadın Gənzə kəndindən olan qəhrəman bir ailənin – bir ocağın iki şəhidini yad etmək üçün ailəmizlə, dostlarımızla və Azərbaycanın müxtəlif bölgələrindən gəlmiş şəhid anaları ilə birlikdə Ceyhun balamızın ildönümündə iştirak etdik. Əmisi Ceyhun Hüseynovun adını daşıyan qardaşı oğlu da, qəhrəman əmisinin izi ilə gedərək, şəhidlik zirvəsinə ucaldı”.

Sfera.az xəbər verir ki, bu haqda “Fireland Group”un rəhbəri, “Mənim atam qəhrəmandır” və “Mənim oğlum qəhrəmandır” layihələrinin təşkilatçısı Cəlal Qurbanov özünün “Facebook” səhifəsində yazıb. O, daha sonra əlavə edib:

“Hər iki şəhidimizin anası və nənəsi olan Səhrayə anamız, övladları və nəvələri ilə birgə, atamın son günlərində onu ziyarət etmişdi. Atam bilirdi ki, Ceyhun balamızın ildönümü yaxınlaşır. Son günlərində onunla tez-tez görüşən və hər anında yanında olan Tofiq qardaşıma xüsusi təşəkkür edirəm. O, atama doğmalıq göstərdi və bir qardaş kimi mənim yanımda oldu.

Atam sağlığında Ceyhun balamızın ildönümündə ailəlikcə hamımızın iştirak etməyimizi bizə tapşırmışdı. Bu, onun son arzularından biri idi. Biz də, başda dəyərli şəhid analarımız olmaqla, anam, ailə üzvlərim, dostlarım ilə birlikdə bu vəsiyyəti yerinə yetirdik. Şəhid Ceyhunumuzun ildönümündə ailəlikcə iştirak etdik.

Ordubadın qonaqpərvər insanları, Ceyhunumuzun əzizləri və kənd sakinləri bizləri böyük ehtiramla qarşıladılar. Bu iki gündə, başda Naxçıvanın şəhid anaları olmaqla, əziyyətimizi çəkən hər bir kəsə dərin təşəkkürümüzü bildiririk.

Bir daha Tofiq qardaşıma, Mədinə bacıma Allahdan səbr və güc arzulayıram. Onları bağrıma basıram. İnanıram ki, bu ziyarətdən yalnız iki Ceyhunumuzun yox, bütün şəhidlərimizin ruhları şad oldu.

Daha sonra şəhid analarımızla birlikdə qədim və müqəddəs bir məkana – Əshabi-Kəhf ziyarətinə getdik. Orda hər bir şəhidimiz üçün dualar oxundu. Rəhmətlik Atam deyərdi: Şəhidlərin ruhunu yalnız anmaqla yox, onları yaşatmaqla şad edə bilərsiniz. Onların ruhlarını şad etmək istəyirsinizsə, ailələrinin, balalarının, atalarının, analarının, xalqının yanında olun!

Biz də çalışacağıq ki, bu vəsiyyəti daim yaşadaq. Çünki şəhidlər ölməz, onlar yaşatdığımız dəyərlərlə, göstərdiyimiz vəfa ilə, onların ocağını tərk etməməyimizlə hər zaman bizimlədirlər.

Allah bir daha Ceyhun balamıza və bütün şəhidlərimizə rəhmət eləsin! Amin!”

P.S. Onu da qeyd edək ki, tədbirdə çox sayda şəhid anaları ilə yanaşı, Hacı Nuran və tanınmış müğənni Mirələm Mirələmov da iştirak ediblər. Sonda şəhidin əmisi Cəmşid Hüseynov ziyarət iştirakçılarına öz adından və şəhidin ailəsi adından öz təşəkkürünü bildirib.